Aizawl: Mizoram State Legal Services Authority-a Member Secretary R.Vanlalena’n court thupek angin nimin khan Central Jail a tlawh a, tang zinga an thubuai chin fel vat phuta chaw ngheia nuar mekte a kawm a. Tun dinhmunah Aizawla jail pathumte a tawt hle a ni.
R.Vanlalena chuan Central Jail-a tang mek zinga April 13, 2023 atanga chaw ngheia nuar mi 18-te chu kawmin, an thil phutte zawtin, an harsatnate a enpui a, an tana hmalaksak theihna awm ang angah tanpui a tum thu leh an tana hmalakna chu ngaichang thiam turin a ngen a, an nawrhna titawpa chaw an nghei chu chhunzawm rih tawh lo turin a ngen.
Chaw ngheia nuar mekte hi an thubuai neihte chin fel vat an phut avanga nuar an ni.
State Legal Services Authority Member Secretary hian Central Women Jail leh Aizawl District Jail te a tlawh bawk a, jail a tlawh chhan hi Supreme Court of India-in Sonadhar vs State of Chhatisgarh inkhinna thubuai kal lai meka order a siam leh Gauhati High Court, Principal Bench-in Writ Petition (Civil) (Suo Moto) No.8 of 2018-a order a lo pass tawh anga tlawh a ni.
Thudawn danin tun dinhmunah hian Central Jail, Central Women Jail leh Aizawl District Jail-ah te hian mi tang awm thei tur chin bituk let aia tam fe an awm vek a, chuvang chuan tun dinhmunah heng jail-te hi a tawt hrehawm hle a ni.
Central Jail-ah mi 438 tang awm thei tura ruahman a nih laiin mipa 889 tang an awm mek a, Central Women Jail-ah hian tang 96 awm thei tura ruahman a nih laiin hmeichhia 273 tang an awm mek bawk a, Aizawl District Jail-ah pawh tang 90 awm thei tura ruahman a nih laiin tang mipa 143 an awm mek a ni.