Tun thla ni 9-a Chakma Autonomous District Council (CADC) inthlan lo awm tura Rengkhasya biala BJP candidate Amit Kumar Chakma chu nizan khan mi kut tuarin a thi a. Rengkhasya bial bikah inthlan buatsaih a ni ve rih dawn lo nia thudawn a ni.
Chawngte atanga thudawn danin, nimin (May ni 4, 2023) khan Lokhisury-a BJP rally-ah buaina tenau a chhuak a, he buaina chhuak avang hian Vasei Police te rualin Amit Kumar Chakma leh midang te chu remna siam tumin Rengkhasya atangin buaina chhuahna hmun Lokhisury-ah hian an kal a, kut an lo thlak ta mai nia thudawn a ni.
He thil thlengah hian Amit Kumar Chakma bakah a kalpui midang 3 te pawhin kut tuarin hliam an an tuar a. Pawikhawihtua puh te chu Police ten la nghalin, an zingah MNF candidate Prema Ranjan Chakma pawh a tel nia thudawn niin, boruak duhawmlo dang erawh a awm zui rih lo nia thudawn a ni bawk.
Nunna chanta Amit Kumar Chakma hi Rengkhasya bial atang hian INC ticket-in vawihnih thlan tlin a ni tawh a, CEM pawh ni tawhin, INC atanga MNF-a a luh hnuah tuntumah hian BJP ticket-in he bialah tho hian candidate a ni ta thung a ni.