Aizawl : BJP Mizoram Pradesh President Vanlalhmuaka chuan Chakma Autonomous District Council (CADC) hmasawnna tur hian BJP lo chu an awm lo niin a sawi.
Nilaini zan khan CADC election campaign a cham mek Vanlalhmuaka hian Mondirasora, Ajasora leh Kamalanagar ‘N’ ah te campaign neiin thu a sawi a. MNF party chu Mizoram hmun dangah pawh an hnawl mek chhan chu an intiamna an tihhlawhtlin ngai loh vang niin a sawi a. “Kumin CADC election lo awm tur ah pawh MNF party chu kan hnawl tawh ngei ka ring,” a ti.
Congress chungchang sawiin Vanlalhmuaka hian, “Central-ah an tluchhe tawh a, Mizoram-ah phei chuan awmna chi a ni tawhlo tih a chiang,” a ti a. ZPM party pawh Chakma tel loin sorkarna siam thei tia minority hmusit taka an sawi hnuah tun hnaiah an rawn hmangaih leh thut hi an kalphung thar a nih thu a sawi.
Vanlalhmuaka hian BJP chu central-ah an sorkar mek avang te, CADC-ah an sorkar leh dawn avang leh MLA inthlanah sorkarna an siam hunah triple engine tak tak a awm theih dawn avangin chak leh zualin engine oil tha tak nen hmasawnna an thlentir dawn nia sawiin, “CADC hmasawnna tur hian BJP lo chu an awm lo a ni,” a ti.
BJP Mizoram President hian minority te thliar lo party, India mi tu te tan pawha awm, Mizoram mipui huapzo party BJP hi CADC mipuite hian an thlan nge a beisei tih a sawi a. CADC hmasawnna tur leh an duhthusamte tih hlawhtlin a nihna tur leh hmasawnna tak tak CADC-in kan hmuhna turin BJP official candidate-te lo vote theuh turin a sawm.
CADC General Election campaign neih mekah hian Dr. BD Chakma MLA, CADC President leh party hruaitu thenkhatte chuan President hi an telpui bawk a ni.