Aizawl: MPCC President Lalsawta chuan Mizoram tan, Chakma ram mipuite tan sorkar tha tak an siam dawn tih a sawi.
Ningani khan Chakma Autonomous District Council (CADC) inthlan lo awm tur inbuatsaihnaah Congress party chuan Borapansuri II-ah vantlang inkhawm a buatsaih a, party president-in hmanpuiin inthlan turah an party-ah hmel thar ni tin hmuh tur a awmchho zel chu lawmawm a tih thu a sawi.
CADC inthlan turah thalai lehkhathiamten Congress an zawm nasa tih sawiin Lalsawta hian, “Candidate pawh kan nei tha ber a. CADC-a Congress Party candidate-te in vote hian in dam khawchhuah nan vote in thlak a ni. CADC inthlan hnuah kum tawpah nangmahni aiawha ding tur kan thlang dawn. Mizoram tan, Chakma ram mipuite tan sorkar tha tak kan siam dawn,” a ti.
Congress party-in Mizoram tan sorkar tha siam a tum dan leh Autonomous District Council (ADC) kalpui a tum dan chu ram leh hnam tan a tha tih sawiin, “Inthlanna ral muang tak, tluang taka neih a nih theih nan theihtawp kan chhuah a. CADC inthlanah MDC tha tak, Chakma ram leh Chakma mipuiten an neih kan duh a. Chakma mipuite pawhin kan duhna min tawmpui a ni tih kan hria,” a ti bawk.
MPCC president chuan Chakma mipuite, Mizoram hmun tinah mi rethei tam tak an awm a. Keimahni tan hian kan din chhuah theihna turin tang puihna an pe dawn tih a sawi a. Hna hrang hrang thawkte tan cheng nuai hnih aia tlem lovin a pui dawn a, he rama cheng mipuite hi mi taima ram an dinsak dawn niin a sawi.
Congress party chu a changa Chakma tel lo sorkar din dawn tia a changa Chakma en hran loh thu sawi a parthi awrhtir leh hnuhnawh ang mai mai an nih ve loh thu Lalsawta hian a sawi a. ZPM party chu mi hmuha tha tak anga lang, sorkar hma pawha candidate vanga buai, MLA candidate-ah lamtang nei tam zawk nih tuma buai an nih thu a sawi.
Vantlang inkhawmah hian MLA Nihar Kanti Chakma, Mahila President Vanlalawmpuii Chawngthu, President Mahila Hqrs, MPYCC President Dr. Lalmalsawma Nghaka leh CADC inthlan tura candidate mi pathumten thu an sawi.