April 29 atanga kang tan tawh, Nagaland-a ramsa leh hnim chi hrang hrang awm tamna, Dzukou Valley ram kang chu thunun a ni ta.
Kohima Divisional Forest Officer (DFO) Rajkumar chuan ram kang an thunun theih tawh thu hi a sawi.
“Thawhhona tha tak nena beiin a kang zel tur chu ven a ni tawh,” tiin Kohima DFO chuan a sawi.
Dzukou Valley ram kang hi Nagaland Police, Forest Department, National Disaster Response Force (NDRF), State Disaster Response Force (SDRF) leh Southern Angami Youth Organization (SAYO) atanga inpeten a huhovin a thelh hna an thawk.
“Kohima Police-in Dzukou luhna, Viswema khuaah control room an siam a hmun dang pahnih – resting shed leh Dzukou base camp-ah relay station an siam bawk a, hei hian thawktute inbiakpawh a tiawlsam hle,” a ti.
Pawl hrang hrang hian kangmei thunun tawh, la mit lote an thelh zui zel a, Army pawhin an zawm thar bawk.
Army leh Assam Rifles hian NDRF te hi awmna tur leh a hmunhma an hriat zung zung theihna turin an pui.
Indian Air Force (IAF) pawhin Dimapur atangin Mi-17 helicopter pali thawhin Bambi bucket operation-ah an thawhhlawk hle bawk.
Dzukou Valley hi Nagaland khawpui, Kohima atanga km 30 vela hla, khualzinte tlawh tam tak a ni a. Nagaland-Manipur inrina laia awm niin hunbi neia par chu thlai hrang hrang leh tui lama cheng chi pawh a tam hle. He hmun chauhva awm, Dzukou Lily chu a larpui hle nghe nghe.