Myanmar ram mi, an ram buaina avanga Manipur-a tlanchhia mi pasarihte chu New Delhi-ah kalin United Nations High Commissioner for Refugees (UNHCR) pisa an dawr dawn.
UNHCR dawr tur zingah hian Yangon-a media house-a thawk chanchinbumi pathum pawh an tel a. Court-in him taka zintir tura Thawhtannia thupek a tihchhuah hnuah Delhi an pan ang.
Heng Myanmar mite hi Manipur-a ramri, Tengnoupal district-a Moreh khuaah an biru a, April 21 khan Imphal thlengin court thu angin venhim an ni.
Myanmar ram hi February 1-a sipaiten mipui rorelna paih thlaa thuneihna an chan hnuah mi eng emaw zat – police, sipai leh ram rorel khawma mite pawh telin, an thenawm, India-a Manipur leh Mizoramah inhumhimna zawngin an tlan lut.
A tam ber hi sipai sorkar paih thlaa mipui rorelna din leh tuma hma lakna, Civil Disobedience Movement (CDM)-a telte an ni.
Sipai sorkar beih letnaah hian civil mi 750 chuang thah an ni tawh niin an sawi a ni a. Hnam bil hel pawl eng emaw zat chu pawng thar lehin sipai sorkar nasa takin an bei bawk.
Thawhtannia Manipur High Court-in UN an dawr theih nana an zinkawnga venhimna an dil a ngaihtuahnaah judge-te chuan pem leh himna zawngte dinhmun chu a inang lo tih an sawi.
“Kan ramah hian tum neiin, kan dan bawhchhe miah lovin an lo lut a. An ram chu an tan chenna tura him lo leh zalen lo niin an tlanchhiatsan a ni,” an ti.
Myanmar-a chanchinbute thil pho lan atangin, Mizzima Media Organization-a thawkte chu an ramah an haw leh a nih chuan an nunna atan a hlauhawmin an zalenna a derthawng thei dawn niin judge-te chuan chanchinbumite chungchang a sawi bawk.