Kum tam tak chendun hnu pawhin ‘Inthlahlel tawnna hi nupa inkarah a la awm tak tak em?” tih hi inzawh fo tur a ni a, zawhna tlanglâwn tak pawh a ni nghe nghe.
Boruak tha leh duhawm a awm theihnana theih tawp chhuah reng hi thil pawimawh tak a ni a, ‘run dal’ emaw ‘ngaia neih’ ang chi pawh a ni tur a ni lo.
A nih leh, engtinnge nupa inkarah hmangaihna te, duhsakna te, thlakhlelhna te adt. a awm theih ang?
Lockdown zawh lama Restaurant induhna bera kal thin emaw hmun thengthaw nuam intihna leh kal in châkna hmun tlawh thin ang che u.
In pahniha intih theih tur ang chi ‘list’ duang chhuak u la, ni 2-1 emaw chumi atana dah tha-in, buaipui rawh u. Hmalam (nakin) hunah tih a ngai lova, tun dinhmuna kalpui kha a pawimawh ber. I nupui khan, In chhung sekrek khawihah i puihna leh a hahdamna tura i tanpuina a duh ngawih ngawih thei a, hun hman dun tum ang che u.
Kum tam tak in lo awmdun tawh mai avang khan inzahtawnna te, inngaihpawi-mawh tawnna te leh infakna te hi a tul tawh lo a ni reng reng lova, chhunzawm reng chi a ni zawk. A thawmhnaw lei leh neih thar te kha a mawi zia hrilh la, a lu meh fuh zia te pawh sawi harsa a ni lo.
Nupa inkar boruak titha tur chuan inremsiamna hi a pawimawh em em a, kawppuite râwn hmasa lo leh an ngaihdan zawt hmasa lovin thutlukna siam thut thut ngai suh ang che. A ngaihdan leh hmuh dan te ngaihtuah pui la, pumkhat mah ni u la, pâwl (team) in nihna hi tam tak a awm tih hriat fo a tha.
Thinlung taka inhriatpuina leh inlawmna hian nupa dinhmun a sawhnghet hle. I lan dan kha uluk thin la, mi zingah te, inleng neihnaah te, kawppuite chawi-mawi leh ngaihthatna thlen tirna hi tunmaiah leh damchhunga a hlawkna chhiar sen loh tel theihna a ni.