Aizawl : NE Khawdungsei Branch YMA buatsaihin nimin khan Ralngama leh Tlangkhama Hlate Zirna hun hman a ni. He hun Dr L Thangmawia, MAL chuan khuallian niin a hman pui.
NE Khawdungsei YMA Hall-ah hun hmanah thu sawiin Dr L Thangmawia chuan, hla phuahthiam pahnih Ralngama leh Tlangkhama hlate zirna an pianna khua ngeia neih a ni chu a lawmawm thu leh hlu hlea a hriat thu a sawi a. Thu leh hla hi khawvel thiamna sang zelah hian ngaihthah theih a nih loh ziate, mihringte phuar khawmtu leh fuihtu, beidawnna leh manganna ruama awm lai pawha hnemtu leh fuih thartu a nih avangin ngaihhlut deuh deuh tul a tih thu a sawi.
Dr. L. Thangmawia chuan thu leh hla ziaktute chu mi tlawmte, an hunlaia mite ngaihsan ni lo mah se, an thu leh hlate erawhin an hlutzia an tilang deuh deuh dawn a ni tih a sawi bawk.
Mizo Academy of Letter (MAL) President Prof. RL. Thanmawia kaihhruai Ralngama leh Tlangkhama Hlate Zirna hun hmanah hian Dr. H. Laldinmawia, Asst. Professor, PUC; Dr. Lalthasanga, Principal HSS, NE Khawdungsei, Dr. Lalhlimpuii, Asst. Prof. MCC; Dr. Thanghmingliana, Asst. Prof, Govt. T. Romana College te paper zir ho a ni.