Manipur-a tual chhung buaina chhuak mek avanga harsatna tawk mek Zohnahthlakte himna turin Mizoram sorkarin theihtawp a chhuah mek a, Chief Minister Zoramthanga’n Imphal-a Mizo zirlaite chu thlawhtheihna hmanga thiar chhuah a tul a nih chuan Mizoram sorkar a inhuam thu leh hmalak nghal a nih thu a sawi.
All Tribal Students’ Union, Manipur-in Nilainia Manipur district tina kawng an zawh hnuah mipui an la tin fel hmain Churachandpur daia Anglo Kuki War Gate chu Meitei nia hriatten an hal a, a chhehvelah chi leh chi inkarah buaina a chhuak nghal a ni.
Churachandpur atanga thu dawn danin Imphal-ah hian Meitei-in Zofate an bitum a, Kristian biak in thlengin an tichhia a, nimin tlai lam thleng khan Imphal leh a chhehvelah biak in 24 vel tihchhiat a ni a, minister (Kuki) chenna in pawh an bei.
Churachandpur leh a chhehvelah Zofa awm biakpawhte chuan Zo hnahthlak hrang hrang an tanrual thu leh an inpumkhat thu an sawi a, Imphal-ah pawh an tangrual a; mahse, inzawmkhawma inpuih dan tur leh tan tlan dan tur an nei rih lo nia an hriat thu an sawi.
Chief Minister Zoramthanga chuan Manipur-a buaina chhuak mek ching fel vat turin Union Home Minister Amit Shah leh Manipur Chief Minister N. Biren Singh te a ngen a. Nimina MZP hruaituten Imphal-a Mizo zirlaite an sahimna atan la chhuak tura an ngennaah chief minister chuan thlawhtheihna hmanga thiar chhuah a tul a nih chuan Mizoram sorkar a inhuam thu leh hmalak nghal a nih thu a sawi a ni.
Manipur-a tual chhung buaina thleng mek chungchangah hian Mizoram sorkara home department chuan thuchhuah siamin Manipur-a buaina awm mek chu Mizoram sorkarin pawi a ti hle a, he buaina avanga Manipur chhunga Zohnahthlakte tawrhna pawh sorkarin a hria a, buaina chhuak mek chu reh thuai se a beisei thu leh he buaina avanga harsatna tawk mek Zohnahthlakte himna turin Mizoram sorkar chuan theihtawpin hma a la nghal tih an sawi.
Mizoram sorkar chuan Manipur-a buaina chhuak tipunlun zawnga hmalakna awm reng reng dodal tura Mizo mipuite an ngen a, Mizorama cheng Meitei-te pawh thlamuang taka awm turin an ngen a, he buaina hi a hma thei ang bera tihreh a nih theih nan anmahni zawn a hma la turin a ngen tih an sawi bakah sorkarin Mizoram chhunga Meitei awmte pawh an himna a ngaihtuahin hma a la nih tih hre tur leh ring tawk tura an ngen thu an sawi a ni.
Buaina chhuak chungchangah hian Rajya Sabha MP K.Vanlalvena chuan nimin chhun khan Union Home Minister Shah hnenah leh Union Home Secretary Ajay Kumar Bhalla, IAS hnenah ching fel tura ngenna a thlen.
He buaina thleng chungchangah hian Mizorama political party leh NGO-te pawhin thuchhuah neiin ZPM party chuan Chief Minister Zoramthanga chu Zohnahthlakte himna a rang thei ang bera ngaihtuah tur leh hmun hlauhawm zuala awm mekte phei chu hmun him zawka thiarchhuak turin an ngen.
ZORO pawhin dinhmun him lo a awm mek Zofate sahimna ngaihtuaha a rang thei ang bera tih tur ti nghal turin India sorkar an ngen bawk.
Congress party pawhin Manipur-a buaina chhuaka nunna hlu tak chân an awm leh hliam tuar tam tak an awm chu tha lo an tih thu leh buaina tireh tur leh hnam tlem zawkte leh an sakhua humhimna kawnga chak lehzuala hma la turin Manipur BJP sorkar an ngen tih an sawi bawk.