- Ruata
Hmanni lawk khan Toyota chuan Innova Crysta chu an tichhuak tha leh a, Toyota Innova Hycross pawh a chhuahna a la rei lo a. Innova hi duhthlan tur pahnih a chhuahna rei tawh leh Innova sawia mitthla theih design, Innova Crysta leh thar, Hycross a awm mek a. Innova Crysta hi tunah hian a variant thar, a man to ho man tur an puang thar leh ta a. Tichuan variant 4 – G, GX, VX leh ZX te a awm ta a ni.
Toyota Innova Crysta variant hrang hrang man
Toyota hian a hma khan GX trim Innova Crysta chu a man tur an puangzar tawh a, Rs Nuai 19.99 man atangin a intan dawn a ni. Tunah hian variant thar pahnih, VX leh ZX trim te man tur pawh a hriat theih ta a. Innova Crysta VX 7-seater hi Rs Nuai 23.79 man atangin a intan a, 8-seat variant hi Rs Nuai 23.84 man atangin a intan thung a ni. Top model Innova Crysta ZX hi Rs. Nuai 25.43 man a ni thung a, he model hi seven-seater a ni.
Thil thar leh danglamna tam lo
Innova Crysta an rawn tihchhuah thar leh hi a hma bawrah danglamna tlem tlem a awm a. Hei hian a hmaa chhuak thin nena khaikhin pawhin danglamna a siam a, a hmel pawh a ti thar zual a ni. Innova Hycross pawh sawi tawh angin chhuak tel ve mek a ni a, hemi nen pawh hian design lamah a danglam viau a ni. Hetihrual hian a hmaa lo chhuak tawh thin nena khaikhin chuan Innova Crysta ah hian danglamna liantham lutuk a awm lo a, a chhunglam leh a kentel hrang hrangah pawh danglamna liantham a awm lo a ni.
A khawl lam
Toyota Innova Crysta hian 2.4-litre diesel khawl neiin 5-speed manual gearbox a awm a. He khawl hian 150hp power leh 343Nm peak torque a pechhuak thei a. Petrol khawl duh zawk tan emaw, petrol-hybrid emaw duh tan chuan Innova Crysta-ah hian diesel chauh a awm chhunzawm zel avangin Innova Hycross an lei zawk a ngai dawn a ni.
Himna lam leh kentel hrang hrang
Innova Crysta hian kentel hrang hrang – powered driver seat, multi-zone climate control, picnic table, leather seat, ambient lighting leh one-touch tumble (a thutna tlar laiah) a awm a. Heng bakah hian 8-inch touchscreen with Android Auto & Apple CarPlay connectivity leh thildang hrang hrang a awm a ni. Himna lamah chuan airbag pasarih, front & rear parking sensors, electronic stability control leh hill-start assist te a awm a. Innova Crysta zawng zawngte hian three-point seatbelt chu standard fitment-in passenger zawng zawng tan a nei vek bawk a ni.
Innova Crysta kan la hmu zel rih dawn
Kan sawi tawh angin Toyota hian Innova Crysta hi an titawp lawk a, tunah hian an rawn tichhuak thar leh tawh a. Tichuan tun tumah hian variant zawng zawng man tur an puan kim thu kan hre thar leh ta a. Toyota hian tihtawp an tum viau na a demand sang leh chhan hrang hrang avangin an siam chhunzawm leh ta a ni a, hun eng emaw chen chu a la chhuah zel a rinawm a ni.