Pakistani court chuan a fate hmuh laia nu pakhat pawngsualtu mipa pahnih, ram puma mi tam tak tithinrimtute chu thi turin a ti.
Abid Malhi leh Shafqat Ali Bagga te hian Pakistani-French nu, a fate pahnih nena kawngpuia an tang chu an pawngsual a ni.
Petrol neih loh vanga Lahore khawpui dai maia kawnga an ding chu an pahnih hian an car kawngkhar an tichhia a, an rawk a, a fate hmuh lai hian an pawngsual a ni.
A hmeichhia kawmtuten a thil tawn an sawi chhuah hnuah ram pumah he thil duh lohna hi lantir zui a ni.
Inrinni khan Lakore-a special court chuan pawngsualtute pahnih hi mi pawngsual rawn, mi ruk bo, rawk leh firfiaka chetna avangin thi turin a hrem.
An aiawha ding dan hre mi chuan court thutlukna hi court sang zawkah an khing let dawn tih a sawi niin AFP news agency chuan a tar lang.
He thil hi September 9, 2020-a thleng kha niin nu hian a fate pahnih nena Lahore an panna kawngah a petrol a tlan kang avangin kawngpui a ding.
Gujranwala-a a chhungte a biak hnuah motorway emergency number an pek chu biain an pui ta chauh a ni.
A chhungten police hnenah an sawi dan chuan mipa pahnih, kum 30 chuang ve ve turten a car chu tichhiain a pawisa leh a tlereuhte an chhuhsak a. A bula lo zawlah a fate hmuh laiin an pawngsual a, an tlanchhe ta niin an tar lang.
Police-te chuan amah hian a hlauh em avangin amah beitute hmelhmang pawh a sawi hleithei lo niin an sawi.
Lahore-a police hotu pakhat, Umer Sheikh chuan hmeichhe dem zawngin, engvanga kawngpui lun zawk thleng lo nge a nih tih te, mipa kalpui lova a zin te, a chhuah hmaa a petrol a endik hmasak lote chu a dem thu a sawi zui a. A hnuah pawh he thu hi vawrh darh a ni bawk.
Mi tam tak erawh chuan Pakistan chu France ram ang maia hmeichhe zalenna nia a ngaih avang nia sawiin pawngsual a tawk chu an dem a. Ram pumah a titu hrem duhna aupui a ni zui.
December khan pawngsual hremna dan chu ramin a siam ta a, rang zawka thu remin hremna pawh na zawk pek an ni.