Aizawl : Reduce, Reuse, Recycle (RRR) Centre chu Inrinni zing khan Aizawl Municipal Corporation (AMC) Ward tinah hawn a ni.
RRR Centre-ah hian a duh apiangten thawmhnaw hlui, la hak tlak site, paper, lehkhabu, bottle leh thil dang, la hmantlak si te dah theih a ni a, thil chi hrang hrang la hman theih site chu a mamawhten an mamawh angte a thlawna an lak theih tura ruahman a ni.
He programme hi Ministry of Housing & Urban Affairs ruahmanna, AMC-in a bawhzui a nih thu Aizawl Mayor Lalrinenga Sailo chuan The Zozam Times a hrilh a. May 20 atanga June 5, 2023 thleng kalpui phawt tur a nih thu sawiin, a hnu lam zel chu sorkar laipui ruahmanna anga kalpui tur a nih thu a sawi.
AMC Executive Corporator B Lalawmpuii pawhin RRR Centre chungchang hi The Zozam Times hrilhin, “RRR Centre hi bawlhhlawh paihna a ni lo,” tiin, “in chhunga kan hman tangkai si loh, a mamawhtu tana hman tangkai theih tur site dahkhawmna tur a ni a, chu chu a mamawhtuten a thlawnin an lo hmang thei dawn a ni” a ti bawk.