Ukraine President Volodymyr Zelensky chuan Bakhmut chu a chhe vek niin a sawi a, Russia-in he khawpui inchuha thisen tam tak a luah tawhnaah hian hnehna an chang ta niin an insawi bawk.
Pathianni khan Ukrainian khawchhak lam khawpui hi a sipaiten an la thunun em tih zawhna chu Zelensky hian, “A pawi a, a lungchhiatthlak bawk a; mahse, vawiinah hian kan thinlungah Bakhmut a awm reng,” a ti.
A hnuah a pisa chuan Zalenskyy-a hian khawpui chu mi dang kutah a tlu ta tih a sawina a nih loh thu an sawi.
Wagner Russian paramilitary chuan Inrinni khan khawpui hi an la niin an lo insawi tawh thung.
An pawl dintu, Yevgeny Prigozhin chuan a fighter thenkhatte nena an thlalak dah chhuakin, a sipaiten khawpui pum an thunun tak thu a sawi.
Pathianni khan President Vladimir Putin pawhin Russia chu Bakhmut inchuhnaah hnehna an chan tak thu leh sipai zawng zawngte chuan chawimawina an dawn tur thu a puang.
Hetih lai hian Ukraine-a Eastern Operational Command thupuangtu chuan BBC hnenah Ukraine hian khawpui chhimthlang lama building tam tak la luahin nawr let turin an inpuahchah niin a hrilh.
Russia-in khawpuia thil ding zawng zawng an tihchhiat avangin Ukraine dinhmun hi a khirh hle tih a sawi a, invenna tur tanhmun tha a vâng tawh niin a sawi.
Hetiang hi ni mah se Ukrainian sipaite hi Russian sipaite hual turin ‘chhim leh hmar lamah an inhawr khawm a, Russian-te nawr let an tum’ niin a sawi.
Mi thiamte chuan Bakhmut hi Moscow tan eng emaw zawng takin a hlu a, hei bakah hian Ukraine indona kal mekah an beih rei ber a nih avangin Russia tan hnehna hlu tak a ni thei bawk niin an sawi.
Ram pahnih sipaite hi August atanga he hmuna indo tawh an ni.
Khawthlang ramte chuan Russian sipai 20,000 atanga 30,000 vel zet Bakhmut-ah hian thi leh hliam an awm tawh angin an awi a, Ukraine ram sipai pawh an inchân hnem hle tho.