Dr Vanlalthlana’n ZPM chu mi dangte tibeidawna, chu beidawnna chu remchanga hman tumah party dangten an puh nia sawiin, “An hriat loh chu, keini hi beidawnthlak tak thil a thlen lai pawha beiseina nei tlattu party kan ni zawk tih hi a ni,” a ti.
ZPM Aizawl North II block extended meeting, Tourist Lodge, Chaltlang, Aizawla kar kaltaa neihah he thu hi a sawi a. “Kan tu leh fate leh kan thlah kal zel tur tan thil tha zawk hnutchhiah turin beiseina kan nei a, chu beiseina tihlawhtling tur chuan nasa takin kan bei mek a ni,” a ti.
Dr Vanlalthlana chuan, “Kan Leader Pu Duha hi mi fel famkim a ni kan ti reng reng lo, chutihrual chuan vawiinah hian ani aia tha, kan ram hruai tur kan nei lo va, rinawm takin kan zui zel dawn,” a ti a. An hruaitute chu sawiselsak an nih zelnaah buaina atana hmang lo tur leh inchhantawn zel turin an mite chu a sawm bawk.