Aizawl: Hachhek bialtu MLA Lalrindika Ralte chuan party-ah a inhmanna la rei lo mah se a hriat phak tawkah Congress party-in a thutiam tihhlawhtlin loh an la nei ngai lo tih a sawi.
A bial chhung Hachhek South Block fanga Darlak, Mualthuam, Thaidawr, W, Bunghmun leh Tumpanglui tlawha mi thar lawm luh inkhawmah thu sawiin Lalrindika Ralte hian, “Party-ah kan inhmanna la rei lo mah se, kan hriat phak tawkah Congress party chuan a thutiam a tihlawhtling lo ngai lo. ‘Kan ti ang’ an tih chu an ti mai zel,” a ti.
Pathian leh mipuite zara Congress party an sorkar a nih chuan mi harsa zawk, dinhmun hnuaihnung zawkte chhanchhuahna turin Tang Puihna cheng nuai hnih, a tul chuan a aia tam pawh an pe dawn tih a sawi a. Tang Puihna chu NLUP anga chhungkaw tin hnena sem dur dur tur a nih loh thu sawiin, “Nasa taka hnathawk, thahnemngai si, ding chhuak thei lo an awm. Chung mite dinhmun tha zawka an awm theihna tura Tang Puihna hi ruahman a ni,” a ti.
Lalrindika Ralte chuan ram dinhmun chhe mek siam tha turin tawngkam thiam lo, mi tam takin politician lo an tihte chu Congress President Lalsawta hoin an pen chhuak tih sawiin, “Kan ram siam tha tur hian theihna kan nei a, chu chu duham loh hi a ni,” a ti a; sorkarna chelh mek MNF party-in campaign-na atana sorkar sum an hmang chu thil dik a nih loh thu leh Congress sorkar laiin sorkar sum hmang a, mipui vau behna leh campaign-na a awm ve ngai loh thu a sawi.
Kum li chuang bialtu MLA a nihna anga an lo inhrawn tawhnaah a mizia te, MLA fund hmanga a hnathawhte hi a bial mipuite chu a hrechiangtu an nih thu sawiin Lalrindika Ralte chuan, “Mi famkim a ni lo chung leh an hriat chian tawh hnua Congress party-a lawm luh tur kan nei thei zel hi lawmawm ka ti tak zet a,” tiin, eptu MLA ni a, chhuantlak leh chapopui tham hna thawh a harsa chunga a chungah a bial mipuiten rinna an la nghat chu lawmawm a tih thu a sawi bawk.