Sumdawnna kawnga dan lova hnam dang thurualpui ngeia hriat, Aizawl khawpui chhunga iron rod & cement dawrte chu CYMA ngennaa khartir an ni.
Aizawl khawpui chhunga iron rod, cement leh balu dawr, dan lova hnam dang thurualpuia hawn nia hriatte chu Inrinni khan CYMA hruaituten an dawrah theuh kalchilhin khar turin an ngen a, dawr eng emaw zat khartir an ni.
CYMA chuan YMA kumpuan, ‘Ram leh Hnam Humhalh’ bawhzuiin Mizo hming hawha hnam dangten irod & cement dawr an hawn te, Mizoten hnam dang thurualpuia hetiang lama sumdawnna an kalpuite chu hun eng emaw chen an zirchian hnuah list an siam a. All Mizoram Cement & Iron Rod Dealers Association (AMCIRDA)-te zirchianna nena enkawp chungin rinhelh kai dawr 91-te chu Inrinni khan CYMA-in hnatlang kovin thuang ngaa insem darhin hma an la ta a ni.
CYMA chuan an list-a awm dawr neitute leh an dawr awmna area branch YMA hruaitu theuhte chu April 10, 2023 khan CYMA Hall, Tuikhuahtlangah kokhawmin, ngenna an lo siam tawh a. Hemi ni atanga thla khat chhunga an hnam dang thurualpuite nen lo inching fel turin hun an lo pe tawh.
An huntiam chhung, thla khat ral hnu, May 12, 2023 khan dawr awmna area branch YMA hruaitute inrawnkhawmin Inrinni khan hnatlang an ko ta nia thudawn a ni.
Inrinnia hnatlangah hian CYMA hruaitu CEC leh Kumpuan Sub-Committee member thahnem tak thawkchhuakin dawr awmna branch YMA hruaituten an mahni veng theuhah an lo tawiawm bawk.
CYMA President R. Lalngheta chuan hemi kawnga an hmalak zel dan tur chu committee-in a la rel zel tur a nih thu a sawi a. Thla khat chhunga lo inching fel tura an ngenna ngai pawimawha an dawr khar tawh te, an hnam dang kawpte lo titawp mi eng emaw zat chungah CYMA hminga lawmthu sawiin, “Mizorama sumdawnna hi ram leilung fate ngeiin kalpui se kan duh a, hnam dang kuta sumdawnna sum a luang lut nasa lutuk hi kan hnam tan a him lo va, Mizo mipuite kan tanrual a tul tak zet a ni,” a ti bawk.