Fashion ṭhang chak tak khawvelah hian brand hian awmzia a nei thui tial tial a, brand ṭhaa kan ngaih chu a man thuah pawh tlâwm kan ti hma a, brand nei miah lo thawmhnaw chu a man a to kan ti hma hle. Khawvelah hian brand langsar tak tak an awm a, heng branded fashion te hi chu dollar sang chuang man pawh nise miin to an ti lo viau zel. Keni ramah pawh branded fashion kan ngai hluin kan ngaisang ta hle a, nei leh nei loin neih theih dan kan ngaihtuah hram ṭhin. Chhungte kar ngawng ngawng a, kar chhuak ta kan awm a, a tuaka tuak ngat ngat pawh ṭhahnem tak kan awm.
Fashion brand tam tak a awm a, chung zingah chuan Burberry hi khawvelin a ngaihsante zinga mi a ni, An kut chhuak hi a tlâwm chhe ngai lo a, a man a to ang bawkin a quality pawh a ṭha. Burberry hi Thomas Burberry-a din a ni a, British luxury fashion house niin, Britain aṭanga invawrh sang ber pawl a ni ang. Trench coat lamah khawvela hmahruaitu an ni a, accessories hrang hrang, bag leh pheikhawk, sana leh rimtui (fragrance) thlengin an tichhuak.
French luxury company lar Dior hi hre lo fa kan tlem hle ang. Kum 1946 khan Christian Dior chuan a din a, design lama an hmingthan ang bawkin ready-to-wear, hak nghal mai theih thawmhnaw an tihchhuahte hi a hmingthang bawk. Savun aṭanga siam thawmhnawah te, fashion accesories, pheikhawk lam, tlereuh, sana, rimtui te mai bakah make-up leh vun enkawlna chi hrang hrang thlengin an siam chhuak. Dior hi hmeichhe inbel lamah chuan khawvela a sang ber pawl a ni a, tunah chuan Dior Homme (Homme – French – Mipa) division an nei tawh a, mipa thuam an siam chhuah bakah naupang pual pawh an siam bawk.
Louis Vuitton hi designer brand lar berte zinga mi a, French fashion house chhunga mi tho a ni a, kekawr bul leh savun aṭanga siam thawmhnaw lamah chuan khawvela hmahruaitu an ni. Hei bakah hian ready-to-wear, pheikhawk, sana, tlereuh, accesories leh sunglass te hi an hlawhtlinpui em em. Fashion lamah chuan kuthnu an ngah hle a, a tê ber aṭanga a lian ber thlengin an tichhuak ti ila a funkim ber ang.
Kum 1909-a Gabrielle “Coco” Chanel din chhuah, Chanel hi a tir chuan haute couture lama khawvelin a ngaihsan a ni a, tunah chuan fashion leh a kaihhnawih hrang hrangah khawvelin a duh ber zinga mi a ni. Actress chhe lo leh a chanchin sawi tawp theih loh Marilyn Monroe khan Chanel perfume lo a hmang ngai lo a, Paris Hilton hian Chanel siam sunglasses a thlang kher ṭhin. Chanel hian jersey fabric an hmang nasain an hmang thiam a, hei hian an thawmhnaw siam chhuah inbel a tinuam.
Giorgio Armani leh Sergio Galeotti tena kum 1975-a an din Armani hi David Beckham-a’n an underwear siam a hâk lar avanga rawn lar an ni ringawt lo a, Italian fashion house kutchhuak hi hman aṭanga tun thlenga khawvel fashion industry-a mite ngaihhlut a ni. An kutchhuak hi khawvela thawmhnaw man to ber ber a ni a, chuvang chuan sap ramah pawh dawr naranah hmuh tur a tam ngai lo a, high-end department store-ah te deuh chauh a awm ṭhin.
Gucci hi khawvela fashion brand hlu ber zinga mi a ni a, tunah hian an brand hlutzawng hi USD tluklehdingawn 8 zet a tling a, a kum telin a pung lehnghal. Kum 1921 khan Florence, Italy-a din a ni a, kum 90 chuang an lo kal tawhnaah hian khawvel tan thil ropui tak tak an siamchhuak tawh a ni. He company thil siam kaihruaitu ber chu Italian te themthiamna leh remhriatna a ni.
Prada hi Italian fashion house tho a ni a, fashion khawvela hriat an hlawh em em bakah hian LG nena thawkhoin, LG Prada phone chu a lar hle a, pheikhawk leh luggage lamah khawvela a chungnung ber zinga mi an ni.
Dolce & Gabbana pawh hi Italy lam chhuak bawk a ni. Domenico Dolce leh Stefano Gabbana ten kum 1985-a Milan, Italy-a an din kha a ni. Ṭhalai leh tleirawl zawkte duhzawng siamchhuah kawngah fashion brand dangtena an tluk hleih theih loh a ni. He-tiang taka ṭhalaite an hipna chhan ber chu casual dress lam an uar hi a ni. Hei bakah hian a dang tam tak a awm. Heng brand-te kutchhuak hi keini tan chuan a man a toin kan inbel phak a ni lo mai thei a, mahse khawvelin a ngaihsan leh a ngaihhlutte an ni.