People’s Democratic Party (PDP) president Mehbooba Mufti chuan indo leh silai chelek chu chhanna tha ber a nih loh thu leh Jammu & Kashmir buaina chin felna tur chuan India leh Pakistan inbiak a nih thu a sawi.
Mufti chuan sorkar laipui pawhin union territory-a mipuite chu dawra an duh dante ngaihven a tul thu a sawi bawk.
Chief minister hlui hian nimin khan Kupwara district-a Zirhama-ah Zirtawpnia firfiakte chetnaa police thi chhungte a tlawh.
Thuthar lakhawmtute a kawmnaah tun hnai kum eng emaw zat chhunga Jammu & Kashmir-a mi tam tak thihna thleng chu pawi a tih thu sawiin, “Sorkar laipuiin a ngaihven miah si lo hi a vanduaithlak tak zet,” a ti.
India chuan China pawh a be thei a nih chuan Pakistan pawh a be thei tur a ni tih a sawi.
“China-in kan ram rawn lutin kan sipai 20 chuang an that a, heti chung hian inbiakna a neihpui a. Vawi tam inbiain chhanna tha tak pawh kan hmu,” tiin Mufti chuan a sawi.
PDP chief chuan Jammu & Kashmir chu India leh Pakistan, mipui, police, vantlang leh venhim hna thawktute tana indona mual a chang mai dawn niin a sawi.
“Indo hi kan felna tur a ni lo va. Silai hian engmah a chinf fel lo va, khawvelin a hman thin inbiakna hmang chauhvin a fel thei,” a ti.