Mizoram Football Association Golden Jubilee chu chu May 25, 2023 zan hian Vanapa Hall-ah lawm a ni dawn a, he hun hmanpui tur hian All India Football Federation Secretary General Dr Shaji Prabhakaran a lo kal dawn.
MFA hi 1973-ah din niin kum 2023 hi an kum 50-na a ni a, kum tluanin he Golden Jubilee hi lawm tura duan a ni a, a hunpui ber chu May 25 hian lawm a ni ang. MFA Golden Jubilee-ah hian MFA chuan Mizoram aiawha football khel tawh zawng zawng leh MFA hruaitu hluite chu tel theuh turin a sawm a ni.
Hruaitu & Player hluite
MFA hi 1973-ah din niin President hmasa ber chu Lal Thanhawla a ni a, hemi hnu hian president panga – Rosangliana, K Liantlinga, PC Vanlalhruaia, J Lalhmingliana leh Lal Thanzara-te awm tawhin an zavai hian an la dam kim vek a ni.
MFA chuan kum 50-na a lawm hunah hian Office Bearer leh Executive Committee member ni tawh zawng zawng kal theuh turin a sawm a, insawm kim sen a harsat deuh avangin lam hmaih palh a awm pawhin he thuchhuah hi sawmnaa pawmsak turin a ngen.
Kum 1973 leh 2023 inkara Mizoram aiawha khel tawh, mipa leh hmeichhe player zawng zawng chu tel vek turin MFA hian a sawm a ni. Kum 50 chhunga sub junior, junior leh senior-a khelte chu kal turin an ngen a ni.
Chawimawina hlan dawn
MFA Golden Jubilee-ah hian India senior international player ni tawh zawng zawngte chawimawina hlan an ni dawn a, hei bakah hian Mizoram atanga AIFF hnuaia kawng hrang hranga a hmasa berte hnenah chawimawina pek a ni ang.
Hei bakah hian AIFF hnuaia champion team ni hmasa ber theuh – National Sub Junior Boys Champion – 2003; National Junior Boys Champion – 2013; Santosh Trophy – 2014; I League Champion, Aizawl FC – 2017; National Sub Junior Girls Champion – 2015 bakah National Games Men’s Champion – 2015 team hnenah chawimawina hlan an ni ang.
Hun hman dan tur
May 25 zan dar 7-7:50 inkar hi player leh hruaitu hluite inhmelhriattirna, thlalak leh thingpui in hun a ni dawn a, Vanapa Hall-ah Mizoram football-a lo tel tawh player leh hruaitute inhmunkhawm hun runpui hman a ni ang.
Dar 8:00-ah Golden Jubilee lawmna hun tan a ni dawn a, AIFF Secretary General leh MFA hruaitute’n thu an sawi dawn bakah chawimawina hun hman a ni ang a, zaithiam zai ngaihthlak a ni bawk ang. He hun hi football inkhelh hun chhung – minute 90 chhung hman tum a ni.