Tottenham forward Lucas Moura chuan kum nga zet a khawsak tawhna White Hart Lane club hi tun season tawp rual hian a chhuahsan ve tawh dawn.
Kum 30 mi Moura hian mualneitu Ajax laka hriatreng hlawh tur hat-trick siamin Spurs chu kum 2019 Champions League final a thlenpui kha a ni a, mahse, tun season-ah Brazilian hi hliamin a tibuai ta tlat a, a khelhna Spurs chuan a contract pawhsei zel loh an titlu ta a ni.
Social media lamah Moura tawng chhuakin, “Ka Spurs. Khawiah pawh awm ila ka thinlung hi he hmunah hian a awm reng fo tawh ang. Ka club i ni a, hei hi ka home a ni kumkhua tawh ang,” tiin.
Spurs pawhin thuchhuah siam tawhin, club tana a hnathawh tawhah lawmthu an sawi a, a hmalam hun atan duhsakna an hlan nghal.
Kum 2018 khan Tottenham chuan Moura hi Paris St-Germain atangin pound maktaduai 23-in an leichhuak a, kum nga daih inremna ziahpuiin, north London club tan hian khelh 219-ah goal 38 a thunsak tling tawh.
Tunhnai chawlhkar liamta engngemawzatah khan Tottenham under-21 squad lamah a fitness ngai neikir leh turin a inlan nghe nghe.