Mizoram Youth Commission (MYC) Chairman Dr. Vanlaltanpuia’n tun thla ni 6-17 chhung khan London tlawhin, Mizo thalaite hnathawh theih tur te ngaihvenin, University-te nena thawhhona tur kawng te a zawn thu a sawi.
Inrinni khan Aizawl press club-ah thuthar thehdarhtute kawmin MYC Chairman chuan Mizo thalai foreign-a hnathawk tur ten English test an paltlang theihna tura changtlung zawka IELTS (International English language testing system) leh OET (Occupational English test) kalpui thei tur tea hma an lak thu a sawi a. IELTS chu Commonwealth rama thawk tur te tan a nih thu sawiin, Mizo thalai tam takin an paltlang tawh thu leh OET chu UK health sector-a thawkturte tan a nih thu leh Mizo thalai Nurse 5 an hlawhtlin tawh thu a sawi.
Mizo thalaite tana hnathawh tur awm thei hrang hrang te a ngaihvenna lamah British sorkar hnuaia Nurse hna tam tak a awm tih a hriat thu leh Mizo thalaite an luh ve theih dan tur te pawh British sorkar official te a sawipui thu MYC Chairman chuan a sawi.
Pachhunga University College (PUC) Principal-in a ngenna pawh bawhzuiin, PUC leh Royal Holloway, University of London thawhdunna tura ruahmanna awm mek chungchan te Royal Holloway, University of London-a hotute a sawipui thu leh thawhdunna tur hmawr an bawkfel theih thu Dr Vanlaltanpuia chuan a sawi a. Hun reiloteah inremna ziah theih an beisei thu a sawi bawk.
UK-a a cham chhungin UK Mizo inkhawm pawh a chhim thu leh Manipura Zofate tawrhpuinate an lantir thu MYC Chairman Dr. Vanlaltanpuia chuan a sawi bawk a ni.