Siaha khawpuiah Myanmar raltlan zirlaite luhna tur sikul hawn thar a ni a, Myanmar zirlai lehkhabu hmangin zirna hi kalpui a ni dawn.
Kum 2021 tir lam atang khan Myanmar atangin Mizoramah mi thahnem tak an raltlan a, an zinga naupangte chu an awmna khuaa sikulah an lut a, Mizoram sikula zirlai an zir thin ang an zir ve thin a. Naupang thenkhat tan bul tan thar leh an nih avangin harsatna an neih phah a, tun hnaiah Myanmar zirlai lehkhabu hmanga zirna kalpuina tur sikul Champhai leh Siah-ah hawn thar a ni.
Siaha-a Myanmar raltlan zirlaite pual bika sikul din hi May 19, 2023 khan Chin state chief minister hlui, Ni Sui Lian chuan a hawng a, sikul hi Myanmar ramhnuai sorkar National Unity Government hriatpuia din a ni.
Din a nih tirh hian raltlan naupang 192 chu an inziak lut a, vawiin atangin an zir tan dawn.
Siaha-a Myanmar Refugee Committee enkawl sikul hian mimal sikul, Diamond School a tawm dawn a, he sikula zirlaite an bân hnuah chawhnu dar 3:00 atangin zirna an tan ve thin ang.
He sikul hotulu ber tur, Dr. Pen Hmung Ling chuan Myanmar zirlai lehkhabu hmanga zirna hi kalpui a nih tur thu a sawi a ni.
MBSE buaitsaih Pawl 10 exam-ah khan Myanmar raltlan zirlaiten an ti tha hle niin thudawnna chuan a sawi a. Farkawn khuaa Government Thanchhuma High School-a Myanmar zirlai pawl 10 exam-te chu an pass vek a. An zinga pathum phei chu distinction-ah pass-in subject eng emaw zatah letter an hmu a ni.