- Lallunghnema, Charity Lodge
Chhuak hnuhnung berah khan Electric hovin an sum thawhchhuah tur(target) an khum thu leh a kaihhnawih dangte ka rawn sawi tawh a. Zep nak emaw, Electrik ho hi mipui tana thawktu kan rinpui ber an ni a. Inthlahdah thei an ni lova, zawmthaw tak a hna thawh hi an inhmeh lo a ni. Minute khat te mai pawh hi ‘karen’ tel lo chuan hrehawm kan ti thin. Heti chung pawh hian Electrik ho thil tih that hi kan fak tha duh lo a ni ber a. Fakna aiin sawisel an hlawh zawk fo mai hi kei hian na ka lo tihsak thin.
Kan mi ngaihsante hi inkhel thiamte, infiam mite, zai thiamte, Miss tih ang velte hi an ni a.Ngaihsan tur a ni lo tihna ni lovin. Anni ho hi fel bik, tha bik, ram leh mipui hmangaih bikah kan chhal emaw ni teh reng, kan ngaisang lutuk a, mipui huikhawm thei tur a ngaiin politics lipuiah kan zuan luhtir a. Kan ngaisang pherh erh a ni ber.
Hetih lai hian ram mipui tan a thawktu, ngaihtuahna seng em emtu MLA leh Minister -te phei chu nasa takin kan deusawh a, ram budget ei zotute kan ti thul. A pawi hle a ni. Budget ei zo vek ni se hma kan sawn lo ang. Mahse hma kan sawn si. Electric a thawktute pawh hi kan ngaisang tur a ni dawn lo’m ni?
Tun tumah hian Taxation-ho chhiah lak that thu ka rawn sawi dawn. An thawk tha hle tih hi hriatpui ve tawp mai teh. Mizoram sum bawm an ni hial. An chhiah khawn khawm te hi mipui sum a ni a, mipui ta a ni tih an hre bawkin a rinawm .
Chuvangin mipui rawngbawltu revenue chhung lut hnem em emtu hi kan fak tur a ni a, kan ngaisang ve mai tur a ni. Mizoram tana cheng 1 pawh seng lo leh Mizoram tan a thing lukham vawi1 mah keuh lotu ai chuan comsumer-te hman tur thawk chhuaktu Taxation-hi an hlu em em zawk a ni.
Hetiang hian lo sawi ila.
Chanchinbu lian tak pakhat The Aizawl Post chuan 29 April chhuakah hetiang hian a ziak a:
“Mizoram Taxation Department chuan kum 2022-2023 chhunga sawrkarin target an bituk an khum chu 28 April khan an lawm.”
“Taxation Department hi Mizoram sawrkar tan a Revenue chhung luttu lian ber a ni a. He Department hian Goods & Service Tax, Value Added Tax leh Professional Tax atangin chhiah a la thin a, kum 2022-2023 chhunga chhiah lut estimate-ah cheng Vbc 900 hmu tur a beisei an nih laiin Vbc 120,62-in an khum. State pual bik, State’s Own Tax Revenue(SOTR) target Vbc 917,97 chu Vbc 102,87-in an khum bawk a ni”.
Mi thiamho sawi dan chuan Mizoram aia changkang zawk leh hmasawn zawkte chuan chhiah hi an ngai pawimawh em em a. Chhiah hi an sum hnar ber a ni tih an hriat avangin chhiah an chawi tam a, chhiah an pe tha hle tih a ni. Mizoram hian chhiah kan la chawi tlem hle, Income tax kan la chawi lo. China ram te, Japan te, South Korea te, Netherland te, USA-te hi chhiah pek thatna hmun a ni.
Tax petute hi consumer an ni a. Tax pe tha lote chu hrem theih an ni bawk. Chuvangin consumer -te tan Tax chhun luh tam chu malsawmna a ni a.A chhawrtute pawh consumerte tho an ni.