India chuan Kashmir-ah G20 tourism meeting chu China-in a dodalna karah venhimna khauh tak hnuaiah a thleng ta.
Working group meeting hi sorkar laipuiin a enkawlna hnuaia awm union territory-in nipui khawpui atana a hman, Srinagar-ah nghah niin Thawhtanni atanga Nilaini thleng awh tur a ni.
Tun hi India-in kum 2019-a hung bikna a hlihsak hnua helai hmuna khawvel huap thiltihpui nghah vawi khatna a ni.
He hunah hian G20 member ramte atangin palai 60 chuang an fuan khawm a ni.
China chuan meeting-ah hian a tel dawn loh thu a tichiang tawh thung a, India-in ‘ram buai laia G20 meeting ang chi a nghat hrim hrim chu’ an duh lo tih a sawi.
India leh Pakistan ramte chuan Kashmir pum hi an ram ve ve-ah an chhal a; mahse, tlem ve ve chauh an thunun a. Nuclear ralthuam nei ram pahnih hi helai hmunah hian vawi hnih lai an indo tawh nghe nghe.
G20-a tel ve lo, Pakistan hian April-ah tawh khan India-in Kashmir-a meeting a nghat chu sawiselin, ‘a pawisak neih loh thlak’ tiin a sawi.
India erawh chuan Jammu & Kashmir leh Ladakh chu a ram a ni a, G20 meeting leh a kaihhnawih dangte thlen chu ‘thil pangngai’ a nih thu a sawi ve thung.
Kum 2019 khan BJP kaihhruai sorkar chuan Muslim tamna state, Jammu & Kashmir hi state a nihna hlipin sorkar laipui awp turin hmun hnih – Jammu & Kashmir leh Ladakh-ah a then.
Ladakh hi India leh China inrina, Line of Actual Control (LAC) hrula awm niin ram pahnihin an ram an inchuhna a ni.
Indian sorkar leh chanchinbu thenkhat chuan Kashmir-a G20 thutkhawm nghah hi ‘chhinchhiahtlak’ tia sawiin helai vel culture pho chhuahna remchang niin an sawi.
Meeting thlen a nih dawn avang hian a hma atangin India chuan venhimna khauh takin a kalpui tawh a. Heng lai vel hi kum 1989 atang tawha hel pawl tamna niin hengho hi India chuan Pakistan-in a pui niin a sawi a, Islamabad erawh chuan a pha nasa hle.
Kum tam tak chhung chu eptu politician, activist leh tual chhung miten Indian sorkar hian helai bialah hian mihring dikna chanvo rap betin an zalenna a tihpinsak niin an sawi thin bawk a, Delhi chuan a pha thung.