MPCC President Lalsawta’n Zodintluanga Ralte chu MPCC General Secretary atan a ruat zet hnuah nimin vek khan a sut leh nghal.
Thawhtanni khan Congress president hian an party-ah chanvo hrang hrang a ruat thar a. Chung zingah general secretary atan MPCC treasurer a nihna atanga bâng ta, Congress Legislature Party (CLP) leader ni lai, Thorang bialtu MLA ni bawk, Zodintluanga Ralte leh VL Robiaka te chu ruat an ni a; mahse, nimin vek khan general secretary atana Zodintluanga Ralte ruat a nihna hi sut leh nghal a ni.
Hemi chungchangah The Zozam Times zawhna chhangin Lalsawta hian, “General secretary atana kan ruatna hi sut tura min ngen angin kan sut leh a ni. Kan ngaihtuahin, OB kan tihte WhatsApp-a thu kan inhrilh tawn neuh neuhna angah te a tel ve thei dawn si lo a tiin intibengvarin kan lo ruat palh a, kan tihpalh a ni. Kan tifel leh tawh e,” a ti.
Tar lan tawh angin, April 21, 2023 khan Zodintluanga Ralte hian Congress treasurer a nihna atanga bânna a theh lut a. May 1, 2023 khan MPCC president chuan pawm a nih thu, Congress Bhavan-ah MPCC Elected OB – Vice President Lal Thanzara nen an pathumin chanchinbumite hmaah a puang a ni.
Congress president-in nimina chanvo a ruat tharah MPCC Intellectual Cell Chairman atan Lalrinmawia Ralte, ex-minister, Sakawrtuichhun; Secretary-ah Dr Henry Zodinliana, Zarkawt leh member-ah T Sangkunga, ex-MLA, Dinthar; Dr Lalhmingmawii, Mission Veng; Er Sanghrima, Zarkawt; Rev LR Colney, Mission Veng leh Er George Lalzuia, Zonuam; MPCC Election Department Secretary atan S Lalrinawma, Tuikual South leh Legal Cell member atan mi pali ruat an nih bakah MPCC Special Invitee atan mi pali ruat thar an ni bawk.