Aizawl : Sorkar laipui ruahmanna anga ni 15 chhung faina campaign kalpui tur Meri Life Mera Swachh Shehar chu May ni 20,2023 atang khan Aizawl Municipal Corporation (AMC) huam chhungah kalpui tan a ni.
Meri Life Mera Swachh Shehar hawnna hun hi AMC ward no I ah chuan inrinni zing khan neih a ni a, Pathian fakna hla sa, zaithiam lar Lalduhsaki’n Campaign hi a hawng.
Hawnna inkhawmah hian ward no I bialtu, Aizawl mayor Lalrinenga Sailo chuan thu sawiin, bawlhhlawh nia lang te chu tangkaiah a hman theih a, Aizawl bawhhlawh tam takte pawh sumah chantir chhoh zel a nih thu a sawi a. AMC-in in tina bawlhhlawh khawn turin ruahmanna a kal chhoh pui mek a, pilot project ah veng 10 ah kalpui chhin a ni phawt dawn tih a sawi.
Meri Life Mera Swachh Shehar hi May ni 20 atanga June ni 5 chhung kalpui tur a ni a, veng tina hmun remchangah Reduce, Re-use, recycle (RRR) centre siam a ni anga, tah chuan chhungtin te’n an hman tangkai tawh loh, puan, lehkhabu hlui, plastic bur ruak leh thawmhnaw hlui te chu RRR centre ah hian dah khawm a ni anga, a mamawh te’n chung bungrua te chu a thlawnin an la thei dawn a ni.
Inrinni vek khan Ward-IX huam chhung atan Dawrpui Local Council Office-ah Executive Corporator B. Lalawmpuiin Faina campaign hi a hawng ve bawk a ni.