- Ruata
India ramin a nghahhlelh em em Maruti Suzuki 5-door Jimny SUV June ni 7 hian hralhchhuah a ni dawn ta a, mi 30,000 chuangin an book lawk tawh a ni.
Jimny hi liftstyle, off-road SUV huanga awm niin 5-door Mahindra Thar lo chhuak tur bakah 5 door Force Gurkha lo chhuak tur nen an inhmachhawn dawn a ni a. Mahindra Thar 5-door pawh hi August thlaah hian an phochhuah tawh beisei a ni a, Gurkha hi chu a chanchin a la hriat theih mai loh a, hei pawh hi a rei tawh dawn lo viau tura beisei a ni.
Maruti Suzuki Jimny hi a chhuahna rei tawh ang aiin India ramah kan hmu har hle mai a. A lo lut dawn ang lek leka sawi a awm laiin a lo lut lo leh thin a. International market hrang hrangah chuan 3-door version in rei tak a lo chhuak tawh a ni. Maruti Suzuki Gypsy ngaina tan chuan he Suzuki offroader lar hi lei ngei tur chi a ni dawn a. India ramah chuan Gypsy rawn thlaktu tih te pawhin a sawi theih awm e. Offroad adventure lama tuite tan phei chuan lirthei nghahhlelhawm tak a ni a, Mizoramah ngei pawh leitu an tam viau a beiseiawm a ni. A man tur hi kar hnih khat hnuah official-a puan a ni mai dawn a, hetihrual hian media report thenkhat chuan Rs Nuai 10-12 (ex-showroom) inkar vel a nih beisei an beisei a ni.
Maruti Jimny kentel tur hrang hrang
Maruti Suzuki aṭanga lifestyle off-roader thar lo chhuak tur Jimny hi chi hnih chauh a awm dawn a, hei hi Zeta leh Alpha a ni dawn a. A man tlawm zawk Zeta variant hian a neih tur hrang hrangte chu – steel wheel, electrically adjustable wing mirror, 4-speaker audio system, 7.0-inch touchscreen SmartPlay Pro infotainment system, wireless Apple CarPlay & Android Auto connectivity, power windows, color MID display, seatbelt pretensioner, reversing camera, brake limited slip differential, electronic stability program, Isofix child seat anchorage leh airbag 6 te a ni a. A man to zawk Alpha variant-ah hian Zeta-a awm hrang hrang bakah 9.0-inch touchscreen SmartPlay Pro+ infotainment system, wireless smartphone connectivity, Arkamys sound system, climate control, keyless start, cruise control, fog lamp, LED headlamp, headlamp washer, auto headlamp, alloy wheel leh body-colored door handle te kan hmu tel dawn a ni.
Maruti Jimny rawng hrang hrang
Maruti Jimny hi rawng hrang hrang 7 a awm dawn a, chungte chu, Kinetic Yellow a chung dum, Sizzling Red a chung dum, Granite Grey, Sizzling Red, Bluish Black, Nexa Blue leh Pearl Arctic White te an ni.
Maruti Jimny khawl leh tui heh zawng
5-door Jimny SUV thar hian 1.5L, naturally aspirated K15B petrol engine, 5-speed manual leh 4-speed torque convertor automatic gearbox duhthlan tur keng tel a hmang dawn a. He khawl hian 105bhp power a pe chhuak thei a, torque 134.2Nm a pe chhuak thei bawk a ni. Maruti Suzuki Jimny manual gearbox hmang hian petrol litre khatin km 16.94 a tlan thei a, automatic transmission hmang hian km 16.39 a tlan thei thung a ni, hei hi official-a an enchhinna a ni a, kawng dinhmun azirin a danglam thei awm e. SUV lian ho ang leh a hmaa Gypsy-a kan lo hmuh thin angin ladder-frame chassis nghahchhana duan a ni a, Suzuki AllGrip Pro four wheel drive (4WD) system hmanga thuam a ni a, manual transfer case leh low-range gearbox (2WD-high, 4WD-high leh 4WD-low modes nei) a nei a ni. Hei hi mi tam takin an duh chhan tur leh an lei chhan tur a ni a, hetiang ang tiat SUV-a four wheel drive system tha tak nei hi India ramah a tam lo hle a, he lifestyle offroader huang lirthei hi a rawn ti hausa leh sawt dawn a ni.