Aizawl: Zanlawn tlangval, K.Lalruatfela (34) S/o Rammawia chu May 21, 2023 zan khan khawilaiah thia chhar a ni a, motor chil nia rin a ni.
Zanlawn YMA hruaituten an sawi danin, Pathianni zan dar 8 vel khan Zanlawn bangla venga in tawp ber kawtah K.Lalruatfela lo tlu reng chu hmuh a ni a, a lu-ah hliam na tak tuarin an han en chian chuan a lo chat thla fel tawh a, he thil thlen lai hi hmutu an awm lo a. A hliam tawrh dan leh hnuhma vel atangin motor chil ngei nia rin a ni.
Ruatfela an hmuhna hmuna hnuhma vel atanga a lan danin a chiltu motor hi chho zawnga tlan nia rin a ni a, Lungdai lamte hriattir vatin a hnaivaia lirthei kalte an tiding a, chungte chu enfiah a ni a; mahse, rinhlelh tur awm ang an hmu lo a, police-ten uluk takin an chhui zui mek a ni.
K.Lalruatfela ruang hi Pathianni zanah tlaivarpui a nih hnuin nimin khan Kawnpui damdawi inah postmortem a nih hnuah tlaiah vui liam a ni.