Aizawl : BJP Mizoram President Mizorama sorkar tawh leh sorkar mekte hian an hnathawhah ram leh hnam an vei lohzia a lang chiang hle niin a sawi.
Zirtawpnia BJP pisa Mipui Run-a Friday Political Session hun an hmanah thu sawiin Vanlalhmuaka hian, Zohnahthlak te tana ZORO hmalakna hrang hrangte chu BJP Mizoramin a thlawp zel dawn tih a sawi a. BJP hian Mizoram leh hnam hi a ngaih pawimawh ber niin, ram leh hnam a dam loh chuan Mizoram hi a ding chhuak ngai dawn lo tih a sawi.
Mizorama sorkar tawh leh sorkar mekte’n an hnathawh dan atanga thlirin ram leh hnam an vei loh tih a lang chiang hle tih sawiin Vanlalhmuaka chuan, “Chu chuan Mizoram mai ni lo, kan hnam ralna thlenga thil pawi a thlen theih avangin Mizoram hian kan ram leh hnam din chhuahna turin eng party nge kan mamawh tih hi kan zawn a ngai,” a ti.
Vanlalhmuaka hian BJP party-ah chuan mahni inhaivur tumte tan hmuna awm loh thu leh mahni pumpui tanghma hai duh te chu party dangah an se tih a sawi a, “BJP chuan ram siamthat hna tak tak, tawngka ni lova a taka a thawh thin a vangin ram leh hnam dinchhuahna tura thahnemngai tan erawh engtiklai pawhin hmun a awm thung,” a ti bawk.
Mizoram chhehvela Zohnahthlak chengte tan Mizoram hi inpui a nih avangin, a pawimawhna hre thar tur leh, Mizoram hmalam hun hi Mizoram mipuite kuta awm a nih avangin a hmalam kawng ngaihtuah a chhut ngun a ngaih thu a sawi bawk.