Aizawl khawpui tui lakna pui ber, Tlawngah tui a tam leh tan a, Aizawl tui mamawh khawp pump chhuah tur a awm leh tawh.
May 9 atanga 16 inkar khan Tlawng, Reiek-ah hian tui a tlem hle a, PHE department-in tui an pump chhuah thinte pawh a khailak hman hial a, May 17 atangin tui a awm tam leh tan a, tunah chuan luia tui awm a tam leh tawh.
The Zozam Times zawhna chhangin PHE department-a Engineer in Chief F Liantluanga chuan Tlawng tui tlem avanga harsatna awm chu a ziaawm tan a, tun hnaia ruah sur avangin tui a tam leh tawh a, tunah chuan tui pump pawh a pangngaiin a kal leh tawh tih a sawi.
Kar hmasa lam kha chuan Tlawngah tui a tlem hle a, ni khata tui an pum chhuah thin ang pawh tui pump chhuah tur a awm lo hman tih a sawi a, tunah tui hi tam deuh tawh mah se khawchin hi hriat lawk a nih loh avangin mi tinte chu tui renchem zel turin an ngen tih a sawi.
Engineer in chief chuan a kum telin Tlawngah tui a tlem zel tih sawiin, thal laia tui tlem zel avanga harsatna sutkian nan Phase II tuikhuah chhakah hmun hnihah Rs. vbc 38.91 senna tur tuikhuah siam tura ruahmanna an neih mek thu te, an project chu planning department-ah pawh an theh lut tawh a, funding an dap mek tih a sawi a ni.
PHE engineer in chief chuan tui hna humhalh kawngah mipuite an than harh a hun tak zet tawh tih a sawi a, mihring nunna atana pawimawh tak tui chu renchem a tul hle tih a sawi a. Khawlaia PHE tui pipe leak a awm pawhin department hotute hrilh hre zung zung turin mipui a ngen bawk a ni.
Tar lan tawh thin angin May 9, 2023 khan Tlawngah tui litre maktaduai 39.9 vel chauh a luang a, hei avang hian ni khata tui an pump chhuah thin ang, litre maktaduai 30 zat pawh pump chhuah tur a awm lo hial.
Nimina Tlawng an teh leh chuan tui litre maktaduai 236.3 a luang leh tawh a ni.