Inthlan kum a ni bawk a, kan ram politics kalphung thu leh hla in vaw tawn vel chu a ngaihnawm ta hle. Hetih lai hian tun laia thu inchuh hlawm lian tak chu hun kal tawha ram hruaitute dem leh engmah ram tana tih mumal nei lo ang a chhuah leh hruaitu hmasate pawhin thil tha tam tak an lo ti ve thin a ni tih hi a ni a.
Hemi thu ah hian kohhran hruaitu intelkhawm MPF meuh pawhin thuchhuah an siam ta hial a. Hun kaltawha hruaitute tawngpawng dem ngawt chu a dik an ti ta lo bawk.
Mizoram hi state kan nih hnuah pawh kum 30 chuang lai a liam tawh a. Development hi a muang lutuk a, kan hotu hmasate hnathawh loh luattuk vang a ni ti pawl pawh hian an sawi dik tho a. Kan hotu hmasate pawhin an theih ang tawk chuan hna chu an thawk ve ngei mai tih pawh hi a dik bawk.
Engpawh nise, he thu hi a dikna chen a awm kan tih rual hian hotu hlui dem zawng a sawitute hian an uar mah mah avanga MPF meuhin thuchhuah an siam phah niin a lang. Politics anih avanga mi a chhe ber a insawikhum hi a pawi lai chu a ni. Dik lo leh tha lo kan tih pawh hi a ngaihthlak hah dam deuh zawnga sawi theih a ni a. A sawitu puitlin leh puitlin lohah pawh a innghat a ni. Kohhran meuhin a duh dan an sawichhuah chhan hi tunge ni ta ang? Chutiang taka thusawi ching chu ram hruaitu tlak an ni em tih hi mipuite ngaihtuah zawk tawh tur a ni ang. Thusawi thiam tak, mi han dem vel pawh thiam em em ringawtah ram hruaitute hi teh tur nge an hun kal tawh hmangin kan teh dawn tih pawh hi ngaihtuah chian a ngai. Na tak taka mi dem thiam tak, a chhungrila rinawmna nei hauh si lo hi tam tak a awm theih a. Chutih rual chuan thusawi thiam hluak ni lo, mi rinawm, ram hruaitu tura rin ngam an awm thei bawk. Mipuite hian kan politiciante hi kan zir chian a ngai ta hle. Vawikhat thlan sual in kan ram tana pawi a khawih thui zia hre reng chungin kan ram politics hi i sawi ang u.