Aizawl : Zo Reunification Organisation (ZORO) Gen. Secretary L. Ramdinliana Renthlei-in ZORO-in Zofate Inkhawmpui lian buatsaih an tum thu sawiin, hei hi kum 1892-a Kolkata-a Chin-Lushai conference thurel la tihpuitlin loh tihpuitlin a nih theihna tura hmalakna a nih thu a sawi.
Nimina MNF party chhung inkhawma thusawi tura an sawm ZORO Gen. Secretary chuan kum 1892-a Kolkata Forth Willi- am-a Chin-Lushai conference thurel No. 1 – “Chin-Lushai member pumpui a theih anga rangin rorelna pakhat hnuaiah dah ni rawh se” tih a nih thu sawi- in, hei hi tun thlenga tihpuitlin a la nih loh avangin a tipuitlin dan tur ngaihtuahho tura Zofate Inkhawmpui Lian chu buatsaih tum an nih thu a sawi.
ZORO Gen. Secretary chuan “Zofate hi kan duh thu vang ni hauh lovin thendarhin kan awm a, India, Burma leh Bangladesh-ah te kan awm” a ti a. “Zofate hi khawchhak lam atangin thlang kan tla a, thlangtla hmasa leh thlangtla hnuhnungte kan awm a, Zofate hian tawng hrang hrang hmangin, chi peng hrang hrang awm mah ila unau vek kan ni” a ti.
L Ramdinliana Renthlei chuan politics chu chi hrang hranga thliar theih a nih thu sawiin, ZORO chu hnam politics kengtute an nih thu a sawi a. Zofate rorelna pakhat hnuaia awm theihna tura hmalatu an nih thu a sawi.
Tuntuma Manipur buainaah MNF an che tha hle nia sawiin, ZORO Gen. Secretary chuan “MNF party hi Mizo nationalism kengtu tak tak chu in lo ni”, a ti a. “‘Politics’ tih hi a awmzia takah chuan mimal emaw pawl emaw khua leh tui thatna tura inkaihhruaina, mitinin dik taka an chanvo theuh an chan theihna tura rorelna, dan leh thupek, hnam leh hn- am, chi leh chi inkara inunauna tha thlen tura thawhna te, hnam zia- rang humhalhte, ramri khamfel leh mipui vantlang thatna tura rorelna tih te hi a huam vek a ni”, a ti bawk.