M/S Northeast Consultancy Services (NECS)-in Zemabawk khelmual-a phullem an phahna tur lungphum chu nimin khan Chief Minister Zoramthanga’n a phum.
Zemabawk khelmuala phullem phahna tur atana sum ruahman hi Rs vaibelchhe 25.66 a ni a. Aizawl Smart City Ltd hnuaia thawh tur niin October 15, 2023-a zawh tura ruahman a ni.
Tunah hian phullem phahna tur khelmual laih hna thawk tan a ni tawh a. Phullem phah a nih bakah khel sira mipui 1,033 thut lenna leh mi 758 thut lenna tur gallery siam tur a ni.
Zemabawk Tlangvel Judo hall-a lungphum phumna inkhawm buatsaihah Aizawl East I bialtu MLA Zoramthanga, chief minister chuan Zemabawk playground chu Aizawl hmar lama awmte tan chuan infiamna hmun pawimawh tak a nih thu leh a sawi a. Smart City hnuaiah beisei phak aia tha tura hmalakna a awm ta chu lawmawm tiin, ruahman anga tha taka thawktuten an thawh ngei a beisei thu a sawi.
Zoramthanga chuan infiamna chu taksa sawizawina satliah mai ni lovin, eizawnna tha leh ngelnghet tak a nih theihzia infiammi hlawhtling tak takte atanga an hmuh thu a sawi a. Sports chu industry a nihzia te, thalai a tui mi leh talent neiten chutiang kawnga an kal theih nan sorkar chuan sports infrastructure tha zawk din a, a bulthut (grassroot) atangin thuam thain football mai ni lo sports discipline hrang hrangah hmalak a nih thu a sawi.
UD&PA Secretary Lalmalsawma Pachuau kaihhruai lungphum phumna inkhawmah hian AMC Mayor Lalrinenga Sailo leh CEO C.C. Lalchhuangkima, Zemabawk North Local Council Chairman Lalduhsaka Varte te pawhin thu an sawi bawk.