Khawvela sum lam kaihhnawiha ram inzawm khawm pawl, FATF-in firfiakte a pui thin nia a hriat avanga ‘grey list’-a daha a hrek mek, Pakistan chu he list atang hian a la tal chhuak thei dawn lo niin chanchinbu thenkhat chuan an tar lang.
Europe ram thenkhat chuan Islamabad hian tih tura tuk eng emaw zat a la tihlawhtling lo niin an ngai niin an tar lang.
Paris-a hmunpui nei, Financial Action Task Force hian Pakistan hi June, 2018 khan firfiakte suma a puih bakah sum chhehrelh a tam avangin hrek nan grey list-ah hian a dah a. He an hrekna atanga tal chhuah theih nan tih tur a tuk bawk.
A tih tur tuk zingah hian pawisa chhehrelh a awm loh nana hma lak leh firfiak pawlte puih thin titawp tura hma lak tura tihna a tel a, hei hi kum 2019 a ral hmaa tihlawhtling tura tih a ni a; mahse, Covid-19 hripui leng avangin a hun hi pawh seisak a ni.
FATF plenary hi Paris khawpuiah Thawhtanni atanga tanin naktuk thleng a awh dawn a. Plenery-ah hian grey list-a an dah ram hrang hrangte dinhmun thlirin an thutlukna chu a tawpah hriat theih a ni dawn niin Dawn chanchinbu chuan a tar lang.
Plenary an neih hnuhnung ber, October, 2020 khan FATF chuan Pakistan hnena tih tur a tuk 27 zinga paruk chu a tihlawhtling lo tiin February, 2021 thleng grey list-a awm turin a ti zui.
Hemi tum hian India pawhin firfiak a man duh em em pahnih – Jaish-e-Mohammad chief Maulana Masood Azhar leh Jamaat-ud-Dawah hotupa, Hafiz Saeed lakah engmah chetna a nei lo tih an sawi.
Azhar leh Saeed te hi India mi man duh ber zinga mi niin a ram chhunga firfiaka chetna hrang hrangah inhnamhnawihah a ngai a. Heng zingah hian 26/11 Mumbai terror attacks leh nikum hmasaa Pulwama, Jammu & Kashmir-a CRPF bus beihna pawh a tel.