Aizawl khawpui bawlhlawh paihna leh sawngbawlna hmun, Tuiriala Solid Waste Management Centre (SWMC) chhunga bawhhlawh dahkhawm thenkhat chu nimin zing khan a kang a, chhiatna thleng lian tham thleng erawh a awm lo.
SWMC tlawhtu The Zozam Times thudawn danin zing dar 4-5 inkarah bawlhhlawh an dahkhawm thenkhat hi a kang tan a, kangmei a chhuah tirh atangin kangthelh motor pahnihin thelh mih an tum a; mahse, kangmei inmutna hi a thuk tawh avangin thelh mih theih a ni lo.
SWMC enkawltute chuan bawlhhlawh inchhekkhawm a tam a, khua a lum bawk nen, a mawng lam atangin a inmut tan nia an ngaih thu an sawi a, kangmei hi thelh mih mai harsa tura an rin thu an sawi bawk.
Bawlhlawh paihna leh sawngbawlna hmun, SWMC an enkawl dan chungchanga The Zozam Times zawhna chhangin AMC hotute chuan Aizawl khawpui chhungah bawlhlawh a tam a, ni tin bawlhhlawh trip 150 chuang phurh luh a nih thu te, khawpui bawlhhlawh hi a tam tak em avangin SWMC hian a zo tawh lo tih leh hemi avang hian bawlhhlawh dah luh te chu thliar zung zung a har a, bawlhhlawh dah khawm chu a tam lo thei lo tih an sawi.
AMC hotute chuan SWMC tichangtlung turin AMC-in hma a la reng a, bawlhhlawh thliarna khawl, segregation machine pawh lei an tum a, bawlhhlawh tihralna tur, incenerator pawh lei tuma hmalak mek thu an sawi a, SWMC-a bawlhhlawhte chu thliar hran zel a ni a, bawlhhlawh hman nawn theih tam tak hralh a ni tawh tih leh bawlhhlawh tawih theih hmanga lei tha an siam chhuah pawh thahnem tak hralh chhuah a nih tawh thu a sawi a ni.