Asia chhimchhak lam ram intelkhawm, ASEAN an tih ram hruaituten an rama buaina titawp tura ruahmanna an siam chu Myanmar-a mipui rorelna dintu, National Unity Government hruaituten lawmawm an tih thu an sawi.
Nilainia ram 10 telna, ASEAN Summit-ah hian Myanmar sipai rorelnaa an hotupa, General Min Aung Hlaing pawh a tel a, Myanmar rama buaina chhuak chungchang an sawiho.
Nilaini zan khan thuchhuah siamin ASEAN summit-in Myanmar-a buaina chhuak chu tihtawp nghal a nih theihna tura ruahmanna kan siam chu lawm takin an pawm tlang tiin an tar lang.
Sipai leh mipui sorkarna inkarah palaina hna thawk tur, special envoy din a ni dawn a. Heta telte chuan a tul dan azirin Myanmar ram an duh hunah an tlawh thei ang.
NUG thupuangtu chuan chanchin thar an hriat chu lawmawm a ti a, phurna nasa tak an sorkar a pe niin a sawi.
“ASEAN secretary general-in hmalakna tur a siam hun kan nghakhlel tawh a. A chengten zalenna, remna leh muanna ram pumin a neih theihna tura hmalakna tur ruahmanna a siamte a kalpui tan hun tur kan nghakhlel hle,” an ti.