West Bengal chu social media lian, Facebook-a sorkar kum liam ta chhunga party fak mawina lama inseng tam ber a ni.
Facebook-a mahni infak mawi lama insengah hian West Bengal-a a term thum nana thuneihna chelh mek, Trinamool Congress chuan BJP khumin an inseng hnem ber a. Mamata Banerjee kaihhruai party hian ni 90 chhung, March 22 thleng khan an inseng hnem ber.
Hetih chhung hian West Bengal-a political party-te hian Rs. vaibelchhe 3.74 zet Facebook-a infak mawina huang (advertisement category)-a intheh lar nan sum an seng.
West Bengal dawtah hian Tamil Nadu (Rs. vaibelchhe 3.3), Assam (Rs. nuai 61.77), Kerala (Rs. nuai 38.86) leh Puducherry (Rs. nuai 3.34) an awm.
Trinamoolhi party mala inseng tam ber niin ‘Banglar Gorbo Mamata’ (Bengal’s pride Mamata) tih vel vawrh lar nan Rs. vaibelchhe 1.69 an seng a. Bial malah ‘Dum Dum-er Garbo Mamata’ tih chu an vawrh darh nasa hle bawk.
Trinamool-in digital lama infak mawina an tihchhuah thin hi Indian Political Action Committee (I-PAC)-in an tihsak niin anni hi inthlan dangah pawh social media-a an party tana thawktute an ni.
Ni 90 chhung hian Facebook page pakhat, ‘Khotikarok Modi’ (Harmful Modi) tihin an enkawl chuan infak mawi nan Rs. nuai 33.12 zet an seng bawk.
BJP chuan West Bengal-a infak mawi nan hian Facebook-ah Rs. nuai 25.31 vel an seng a. ‘Amar Paribar BJP Paribar’ (My family is BJP family) leh ‘Aar Noi Annay’ (No more injustice) tih chu an vawrh lar hle.
Trinamool-in Facebook page an neih chu mi maktaduai 1.3-in an zui (follow) laiin West Bengal BJP page chu mi maktaduai 1.7-in an follow ve thung.
Congress chuan sum an seng tam lem lo va, Rs. nuai 5 vel chauh Facebook-a infak nan hian an la hmang a, Left party-te phei chuan an hmang mang lo.
Mi thiam (analyst)-te chuan political party-ten digital-a infak mawi nan hian a taka campaign-a an sum theh an chhuah aiin tam an hmang niin an sawi.