Aizawl : Samagra Shiksha, Khawzawl District leh Mizoram Science Teachers Association bultumin Sensitization Workshop on Children’s Science Congress – 2023 chu nilaini khan Khawzawl Vengthar YMA Hall-ah buatsaih a ni a, hetah hian Khawzawl District chhunga High School leh Middle School a Headmaster leh Science Teacher te an tel a, an vaiin mi 103 an tel thei a ni.
Workshop hi Pu K. Thantluanga, Dy. DPC, Samagra Shiksha in kaihruaiin DPC leh DEO ni bawk Pu Lalsikula chuan Workhsop tan hma hian thu tawi a sawi a. Childrens Science Congress-ah hian Khawzawl District in Result tha tak te alo nei tawh thin a, hei hi zirna lama kan hmasawnna pholangtu pakhat a nih avangin School hrang hrangte pawhin kan ngaih pawimawh a tul tih a sawi a. Samagra Shiksha, Khawzawl District leh Mizoram Science Teachers Association bultum a vawiina Workshop buatsaih chuan hmasawnna a thlen ngei a beisei tih sawiin Workshop a tel te pawh tha taka ngaithla a, hlawkna neihpui ngei turin duhsakna a hlan tih a sawi a ni.
Workshop-ah hian Resource Person Dr. Laldinpuia, Associate Professor, Centre for Disaster Management, Mizoram University in Children’s Science Congress buatsaih a nih chhan te sawifiahin Power Point Presentation hmangin hemi atana inbuatsaihna neih dan tur leh Science Congress a tel zirlaite an inpuahchah dan turte kimchang takin a sawi a, zawhna leh chhanna hun te an hmang ho bawk a ni.