Aizawl : Mizoram Merchant Association (MIMA) chuan Labour Law chu Mizo hnam kal zelah hman tha lo nia an hriat avangin Mizoramah he dan hi hman an duh loh thu an sawi.
MIMA executive meeting nimina an pisa-a thukhawm chuan Labour Law chu sumdawnna kawnga Mizo hnam kal zel tur ngaihtuahin tha an tih loh thu an sawi a. State dangah pawh propreitorship angah hmang an la awm loh thu leh, factory lian, insurance company, mi mal bank leh damdawi in lianah te chauh hman a nih thu an sawi. A hmanah hoah pawh hrehawm an ti hle thin nia an hriat thu an sawi.
MIMA chuan Labour Law hman avangin law court-a inkhin te, hnathawh mamawh hun lai taka nawrh huaihawt te, hnathawh hun laia danin a phalsak anga chawlh lakte leh thil tam tak thleng tawh leh thleng mekte a awm niin an sawi.
Labour Law hnuaia mi malin hlawhfa a chhawrte laka hamthatna a pek tur dan hman a nih chuan MIMA chuan chawlhkar khatah ni khat leh a chanve chawlh ziah te, kum khat chhunga chawlh khawl theih anga chawlh pek zat awm chawlh pekte, doctor certificate hmanga medical leave pekte, sorkarin thuneitu tura a ruatte phalnain kum khat chhunga ni 90 chawlh phalsakte, Labour law in a phalsak anga firm pakhata mi pasarih thawk chinin Association an din theih a nawrh phalsakte, casual leave pekte, ni 30 chin eng emaw rokhawlhna avanga thuneituin chawlh pek theihte, central leh state sorkar chawlh apianga chawlh pekte, thil bo leh rinawm loh chungchanga hnathawkte finfiahna awm loa ban mai mai theih lohte leh ban dawna thla ruk (6) hlawh pek ngai si te chu an tan tihngaihna a awm loh thu leh, semi government ang maia kalpui an duh loh thu leh an pawm theih loh thu an sawi a. He dan hi hman sak lo turin sorkar an ngen a ni.