Mizo Zirlai Pawl (MZP) chuan nimin khan MZP rorelna sang ber dawttu Federal Council Sitting an nei.
MZP Federal Council Sitting hi Chairman Andrew F Lalramnghaka, MZP Vice President-in a kaihruai a. House Leader Lalnunmawia Pautu, MZP President chuan House Address neiin, “MZP chu kan hruaitu hmasate atangin ram leh hnam hmangaih tura inzirtir leh engkima ram leh hnam dah hmasa tura beisei kan nih angin, ramin min mamawhna zawnah ke i pen zel ang u” tiin kalkhawmte a sawm.
Tun hnaia Myanmar, Bangladesh leh Manipur buai avanga sa himna zawnga Mizoram a lo tlante, thlamuang taka awm tur leh an harsatna leh puih an ngaihnaah theihtawp lo chhuah pui theuh turin tlang hrang hrang MZP leh a thawhpui pawl hrang hrangte MZP President chuan a sawm bawk.
MZP rorelna sang ber dawttu-ah hian, “Mizo hnam hrang hrang hnam ziarang humhim leh, kan inhriatpawh lehzual theih nan zirlaibua telh turin MZP-in hmalak ni rawh se,” tih leh “Kum 2024-ah ZOFEST buatsaih leh ni rawh se” tih chu MZP Assembly 2023 a rel tura pawm a ni.
Federal Council Sitting-ah hian MZP Headquarters, Sub Headquarters, Branch, Hnampual leh College SU aiawhte an tel.
MZP Federal Council Sitting hi a vawi 56-na, 2021-2023 term a vawi 3-na chu Mualhawih Huan, Sakawrtuichhun-ah neih a ni a. Sanghmingthanga, MZP Treasurer chu Vice Chairman a ni.