Super Typhoon Mawar-in US hnuaia awm, Guam a nuai a, thli chak tak leh ruah tam tak avangin thliarkar pum deuhthawah power a awm loh phah.
Category four storm lai tak hian Guam hmar lam chu Nilaini zan khan thlipui darkar khata km 230-a chak nen a kal pel a ni.
Kum tam tak chhunga US hnuaia awm thliarkarin typhoon a tawrh nat ber pakhat a tling.
Guam-a National Weather Service (NWS)-a meteorologist chuan, “A rapthlak tak zet,” tiin a sawi a. “Electric a awm lo,” tiin thuthar lakhawmtute hnenah khawchin thlirtu hian a sawi bawk.
Guam Power Authority chuan an ram huna Nilaini chawhnu thleng khan customer 52,000 zinga 1,000 velk chauhvin power an nei thei rih niin an sawi.
Electric a that leh thuai theih nan thli chu hlauhawm lo chin a nih veleh an thawk chhuak nghal dawn tih an sawi bawk.
Typhoon avanga thi leh hliam erawh an awm hriat a ni lo va; mahse, hmarthlang pana kalin mi 1,70,000 vel chenna thliarkarah hian ruah inches 20 vel thleng a sur phah theih dawn avangin chhiatna nasa tak la thleng thei reng a ni.
NWS chuan Mawar hi Ningani (India-a Zirtawpni chawhma) thleng la chak viau thei a ni tih an sawi lawk.
Agency hian electric leh tui chu ni rei vak lo chhung a mumal loh theih thu leh typhoon liam fel tur hian chawlhkar a ngai thei niin an sawi.
President Joe Biden chuan Thawhlehni khan emergency puang tawhin sorkar laipui atangin puihna pawh a awm thei dawn tihna a ni a. US Federal Emergency Management Agency chuan an ngaichang reng tih Twitter-ah an tar lang.
US sipaite pawhin thliarkarah hian hmun an nei nual a. US Navy chuan sipai thlawhnate chuan Nilaini khan thliarkar hi an chhuahsan vek a, a chhuak lote pawh hmun himah hun a ni tih an puang.
Guam hi West Pacific Ocean-a awm niin tropical cyclone thawh duhna hmun a ni a. Mawar hi kum 2002-a thawk, $ maktaduai 700 hu thil tichhetu, Pongsona hnua an tawrh nat leh ber a ni thung.
Sik leh sa inthlak avangin thlipui leh ruah thawk a na tial tial nia sawi thin chu finfiahna a la awm lo va; mahse, scientist-te chuan tuipui lum zelin a chung boruak a tilum ve a, hei hian hurricane, cyclone leh typhoon a intisiam awlsam bik hle niin an sawi thung.