India ram civil service in elna sang ber UPSC result chhuak a mizo hming a lang ve phak hauh lo chuan ti ti a ti tam hle a. Social media ah kan dinhmun zahthlak an tih thute, mizote hi mahni induh ve ringawt engmah kan nih tak tak si loh thute a ri tam hle mai. Âng thiam tak tak hriat tur pawh a tam hle. Kan nihna leh dinhmun dik tak pholanna a ni ti tawk an tam hle bawk. Kan education system lam puh vak vak pawh an tam viau.
He result ah hian kan thenawm state a kan tribal puite te kan phak lo hle a. India ram pum vai hnam lian ho leh advance tawhte chu kan el pha lo anih pawhin kan tribal quota chuh pui ho pawh kan phak lo hle a ni a. Ngaihtuah ngai chu a ni. Khawi lai nge siamthat ngai lai tih ngaihtuah hian kan thuneitute hi an phet vat vat a ngai a ni.
Tam tak chuan tuna kan society kalphung hi a dik lo a ni. Kan sawrkar leh kohhran hian engkim mai hi a huau huau zawngin min kal pui a. Thawkrima hlawhtling tur zawnga inkaihhruai aiin tih hut huta ropui tur zawngin mipui hi min kaihruai a ni. Kan kohhran lam lahin Pathian thuril in hrilh aiah zai hut hut, hlim lâm leh camping zawngin min kaihruai a. KTP hruaitu chu vengkhat / khawkhata mi challang leh ngaihpawimawh an ni chho a. Zir tam a bei ngar ngar ai chuan inkhawm tam a, KTP a active tam turin kan thalaite an kaihruai a. Kan khawtlang nuna kohhran chanvo hi a lian em em a. Education a kan hniamnaah pawh mawh an phur lian hle a ni.
A dawt lehah chuan kan education system hi a bul atanga ennawn a ngai. Naupan lai atanga zirlai hriatthiamna aiin byheart system in min kaihruai a. Byheart vek, engmah tak tak hrethiam si lo hian inelna sangah engmah an nih lohzia he result hian a pholang a. Distinction ah pass in lawm viau hlawm mah ila thil tak tak ti turin thiamna kan pe lo tih a chiang. Saptawng te hian tawng zel zul mahse MA zir zo application pawh ziak thiam lo kan ngah ta lutuk ringawt pawh hi engnge a chhan ni ang? Hnathawk tura thiamna tak tak pe tur khawpin education deparment hian engti zawngin nge hma an lak dawn? Thiam lohna tam tak kan nei a ni tiin an in en let dawn em? Nge zirlai leh thalaite an puh fel mai dawn?
UPSC ah hian kan lang lo rei ta khawp mai a. India ram administration en in engtikniah emaw chuan mizo ni lovin kan sawrkar hnathawk luhrum chu hnamdang hovin min thut sak dawn tih pawh a chiang em em a. Kan ngaihnep em em thin ho kan tribal puite chu an la rawn thu ber dawn. Chief secretary hova hnamdang an rawn thut thup hunah meuh chuan engkim mai hi a dang ngei ang. Harh la, harh la zoram i tlai tawh ania.