Pakistan chuan khawchhak lama a thenawm, India chuan an ram chhung, Kashmir-a a kal dan a thlak a nih chuan inbe turin a inpeih reng niin foreign minister chuan a sawi.
Anadolu news agency-in an kawmna, Pathiannia tihchhuahah Pakistani Foreign Minister Shah Mehmood Qureshi chuan tun hnaia inthenawm ram pahnihten boruak tha an neih ve hret hret chu lawmawm a tih thu a sawi.
“India hian August 5, 2019-a thutlukna a lo siam tawh kha a hnuh kir a nih phawt chuan Pakistan hi a lawm ang a, inkawmna kan inmil lohnate sawipui turin a inhawng em em ang,” tiin Qureshi-a hian India sorkarin kum 2019-a ram danpui hmanga Kashmir a hung bikna thin a hlihsak chungchang chu a sawi.
Pakistan leh India hian Himalaya tlangdunga Kashmir hi an ram chin ve ve niin an chhal a; mahse, a chanve vel bak an chang lo ve ve.
Indian foreign ministry chuan Pakistani foreign minister-in a thil sawi hi a la chhawng lo.
Nuclear ralthuam nei ram pahnih, inthenawm maite hi February, 2019-a India awp chin Kashmir-a India sipaiten beih an nih atang khan a chhe thar lehzual a. India hian Pakistan-a inkulh firfiak pawlte tihah chhalin a chhan let nan Pakistan ram china an tawmna nia an sawi chu thlawhna hmangin a kap nghe nghe.