Zo Reunification Organisation (ZORO)-in nimin khan Vanapa Hall, Aizawlah Zofate khawmpui lian an buatsaih a, Information & Public Relations Minister Lalruatkima’n a hmanpui.
I&PR minister chuan Zofate inpumkhatna tura ZORO hmalakna fakin, “Pathianin Zofate hnam anga dinchhuahtira leilung hausakna a la thuhruk pawh a neitu ni tura a tihte hi a la phawrh chhuahtir ngei ang,” a ti a. Chumi tur chuan Zofate inlungruala hrui khat vuana, hnam dangte mithmuhah pawh hnam inlungrualna lantir erawh a tul thu a sawi.
Lalruatkima chuan, “Zo hnam hrang hrangte hmun hrang hrangah awm darh mah ila kan inhre renga kan inngaihsak thin,” tiin, “Tun hnaia Zohnahthlak unaute buaina chungchangah pawh Mizorama raltlante sorkar leh tlawmngai pawlten an lo tuamhlawm a, Manipur atanga raltlan, UPSC exam hmachhawn turte tan pawh Aizawl centre-a an exam theih nan ruahmanna siamsak an ni,” a ti.
Mizo hnam zia, tlawmngaihna chawi nungtu tlawmngai pawl hrang hrang – YMA, MZP, MUP, MHIP, MSU leh pawl dangte chungchang pawh sawiin, Lalruatkima chuan, “Heng pawl ropui tak tak kan neihte hian manganna leh harsatna kan tawhin min ngaihsak a, kan hnam hmasawnna turin hma an la a, heng zawng zawng hi Zofate min tipumkhattu leh titangrualtu a ni,” tiin, “Zofate identity chu rinawmna, huaisenna leh tlawmngaihna a ni a, khawi hmunah pawh awm ila, kan hnam rohlu vawng nung zel tur hian Zohnahthlak zawng zawngten mawh kan phur a ni,” a ti bawk.
Sorkar thuchhuahin a tar lan danin ZORO hi Zofa thendarha awm tawhte insuihkhawm leh rorelna pakhat hnuaia awm tura beitu a ni a. May 19-21, 1988-ah 1st World Zo Convention chu Champhai-ah neih a ni a, He inkhawmpuia palaite chuan ‘Zo’ tih chu hnam pum pui kohna atan an pawm tlang a, Zofa thendarha awm tawhte insuihkhawm leha rorelna pakhat hnuaia awm tura beih chu lungrual takin an pass a ni.