Japan-a thil thleng khât tak thlengin mi pali kah leh vih hlum an ni a, a titua puh mipa pakhat man nghal a ni.
Nagano prefecture-ah hmeichhe pakhat a vih hnuah police pahnih a kap leh a. Thi palina hi a hnua finfiah a ni.
Police chuan an mi man hi kum 31 mi, Masanori Aoki a nih thu leh tual chhung politician fapa a nih thu an sawi.
Japan-ah hian nikum July thla khan prime minister hlui, Shinzo Abe-a chu kah hlum lo ni tawh mah se silai cheleka chetna hi a thleng tam lo hle.
Police officer-te kah phei chu a thleng khât lehzual a, kum 30 chuang hnua a vawi khat thlen lehna chauh a ni.
Ningani khan police-in tlai dar 4:25 (India-a chhun dar 12:55) velah kohna dawngin mipa pakhatin hmeichhia umin a vit tih an hria tih Japanese news agency Kyodo chuan a tar lang.
A bul lawka lova hna thawka awm chuan hmeichhia hi chem feet khat vela sei hmangin a vit niin Kyodo hnenah hian a sawi.
Hetianga a chet chhan hi hriat a la ni lo va. Thil thleng hmututen engvanga vit ngawt nge a nih an zawh chuan, “Ka duha ka that,” tiin a chhang nia sawi a ni.
Aoki-a hi camouflage uniform, lukhum, sunglass leh hmai tuamna nena thawk chhuak nia sawi a ni a, thil thleng ngaihvena kal police officer-te a lo kap leh a ni.
Thi dang pakhat hi a thih dan tak hriat a ni lo va, pitar nia sawi a ni.
Aoki-a hi tlanchhiain Nakano khawpuia a pa inah a nu leh a nutei nen darkar 12 dawn a inkalh khung zui a. A pa, Masamichi Aoki-a hi Nakano khawpuia assembly speaker a ni.
NHK-in video a tihchhuahah chuan an in bulah hian police lirthei leh ambulance a awm nual a. Police officer awmte pawhin body armour leh inphenna kengin in atanga metre 300 vel atangin an hual chhuak vek a ni.
Darkar eng emaw zat hnuah a nu leh a nutei hi an tlanchhuak niin Japanese chanchinbute chuan an tar lang a. Mi thattu bera puh pawh hi Zirtawpni zing lam khan chhuakin man a ni nghal a ni.
Tual chhung chanchinbute chuan Aoki-a hi grape chingtu a nih bakah an vengah gelato dawr a nei bawk niin an tar lang.
Mi chengte chu ina tawm turin email hmang leh au rinna hmanga hrilh an ni a, police hian in tin an tlawh kual bawk.