Aizawl : Tourist Guides’ Federation of India (TGFI)-in nimin khan DMC, Aizawl-ah Convention an hmang a, Tourism Minister Robert Romawia Royte leh sorkar laipuia Ministry of Tourism Director General Manisha Saxena bakah Ministry of Tourism Asst. Director General Niraj Saran leh North East Regional Director Anil Oraw ten an hmanpui.
Tourism Minister Robert Romawia Royte chuan TGFI-in Mizorama inkhawmpui an nghah avanga lawmawm a tih thu sawiin, he khawmpui kaltlang hian zinmi tam zawkin Mizoram an hriat phah ngei a beisei thu a sawi.
Mizorama Tourism department hmalakna hrang hrang sawiin, Tourism Minister chuan ‘Mizoram Responsible Tourism Policy’ chu India rama a hmasa ber ni tura kum 2020-a tlangzarh a nih thu a sawi a. He policy hian Tourism-a hmasawnna tluantling leh tlo, ram leilung tichhelo leh mitin huapzo neih chu a tum ber a nih thu a sawi.
Thenzawla hmunhma hrang hrang te ‘virtual reality’ hmanga chhim theihna tur ‘Thenzawl Calling’ application pawh hman theih a nih tawh thu pawh Tourism Minister chuan a sawi a. Ministry of Tourism duhdanin zirna in hrang hrangah ‘Yuva Tourism Club’ din a nih tawh thu a sawi.
Robert Romawia chuan Tourism department hnuaiah tour guide mi 89 an awm tawh thu sawiin, Mizo tour guide te TGFI-a an inziahluh ve theihna tura hmalakpui turin TGFI hruaitute chu a ngen nghal.
Ministry of Tourism Director General Manisha Saxena pawhin India culture-ah mikhualte chu Pathian tluka zahna pek (Atithe Devo Bhava) thin an nih thu sawiin, tourist guide-te chu he nunphung mawi tak hi vawnghim zel turin a chah a. Khualzin ten awlsam zawka Mizoram leh hmarchhak state te an tlawh theihna turin inkalpawhna kawng, thlawhna tumhmun leh rel kawng te tihhmasawn zel a nih thu a sawi bawk.
TGFI khawmpuiah hian TGFI President Narendra Singh Rathore-a’n inlawmna thu sawiin, a sawi a, chawhnu lamah Mizoram sorkara Tourism Joint Secretary V. Lalengmawia’n ‘Business promotional activities from Mizoram tourism’ tih thupui hmangin thu a sawi bawk a ni.
TGFI hi kum 1996-ah Tourism leh a kaihhnawih sector-a sorkar laipui puibawm tur leh India rama tourist guide te hmasawnna ngaihtuah tura din a ni a. Tour guide 3400 vel member an nei mek a. Tuntuma an khawmpuiah hian India ram hmun hrang hrang atangin tour guide 132 an tel a. Ningani khan Aizawl rawn thlengin, Thenzawl an tlawh nghal a. Vawiinah Reiek an tlawh leh ang.