Paris St-Germain in French league chanchin a record thar an siam a, a vawi 11-na atan Ligue 1 trophy an chawi.
Champion lai hi Inrinni zanah Stade de la Meinau-ah Strasbourg nen an inhmachhawn a. Lionel Messi chuan goal khung record thar a siam hmangin an mamawh point hmu in 1-1 in an inhnehtawk.
Messi hian minute 59-naah goal a khung a. Kylian Mbappe ball pass atangin tun season a a goal 32-na a khung a. Nipuiah chhuak tura ngaih a nih avangin a club tana a goal hnuhnung ber ni thei a ni.
Argentina forward hian Europe a league lian panga zinga goal 496 a khungna a ni a. Cristiano Ronaldo record siam goal 495 chu a khum chiah.
Strasbourg tan hian French striker Kevin Gameiro chuan second half-ah goal khat khung ve mahse PSG hian point khat bak an mamawh tawh lo.
PSG hian tunhnai kum 11 chhunga an league title vawi 9-na la mahse an manager Christophe Galtier-a hma hun a la chiang lo tho.
Galtier chuan, “Bundesliga season tawp dan ka thlir a, hei hian eng league pawh hi lak a hautakzia a tilang chiang hle.”
“Tun season-ah khawiah pawh champion laiten harsatna an tawk vek. PSG ni mah ila champion reng tura indah ngawt theih a ni lo.” tiin a sawi.