Bundesliga season khar ni boruak a ngaihnawm a. League hmahruaitu Borussia Dortmund in an kuta awm tawh trophy chu an hmelma Bayern Munich hnenah an hlan a, a zawna vawi 11-na atan Bayern an champion.
Title inchuhna chu
Season tawp ni ah Dortmund in point 70 neiin bul an tan a, Bayern in point 68 an nei. Dortmund an chak chuan an champion dawn a, Bayern in an khingpuiten point an hloh an mamawh thung.
RheinEnergieStadion-ah Bayern in FC Cologne an hmachhawn a, minute 8-naah Kingsley Coman hmangin goal an khung nghal.
Hetihlai hian Westfalenstadion-ah Dortmund in Mainz an mikhual a, a tawp ni ‘pressure’ zo lovin Andreas Hanche-Olsen leh Karim Onisiwo ten Mainz tan minute 24 chhungin goal an khung.
Cologne in Dejan Ljubicic penalty hmangin minute 81-naah an si phurh an sut a, Dortmund an lawm.
Dortmund hian Raphaël Guerreiro leh Niklas Süle te hmangin an si phurh sut zo mahse Bayern minute minute 89-naah Jamal Musiala hmangin chakna goal an khung a. Bayern an lawm laiin Dortmund mittui a luang.
Eng nge an sawi
Bayern coach Thomas Tuchel chuan, “Hetiang title inchuhna boruak a ka tel thei hi a ropui ka ti. Huntawp dawnah goal kan chhuah a, tun season-ah tiang hi kan ngah. Mahse chakna goal kan khung ta hram a ni. Hetiang boruak hi ropui tak a ni.” tiin a thlirlet.
Dortmund manager Edin Terzic ve thung chuan, “He infiamna kan hmangaih hi a hautak in a nunrawng thei thin tih kan hmu. Kan tan chuan a na hle a, kan kum khar dan hi thawnthu duhawm a ni lo.” tiin a uizia a sawi ve bawk.