Higher & Tenchinal Eduction Minister Dr R Lalthangliana’n Mizoram pumah chhawr tlak thiamna nei an tlem tak em em a, thiamna tak tak chhawr tlak nei turin zirtirtu, nu leh pa leh zirlaite an harh thar a tul tih a sawi.
Inrinnia Hnahthial District Samagra Shiksha huaihawta Darzo Community Hall-a ‘Quality on Education Awareness Campaign’ neihah thu sawiin Dr R Lalthangliana hian a bial chhungah HSCL leh HSSLC-ah pass vekna school an awm nual chu lawmawm a tih thu a sawi a. Pass tharte kal zelna turah duhsakna hlanin, pass zo ve ta lote beidawng mai lo turin a chah.
Dr R Lalthangliana chuan MLA bial danga an la tih ngai loh a bialah chhungah thiamna tak tak paw chhuak thei tura naupangte inchher chhoh dan tur zirtir a, mi thiamte sawma infuihna neiin, career guidance a buatsaih tur thu a sawi.
Higher & Technical Education Minister hian Hnahthial district chu tun hmain India ram leh Mizoram huapa mi thiam IAS-te, Central Service-te, Science lama thiamna sang leh mi hmingthang tam tak an lo chhuak tawh thin a. Tunah erawh Central Service, All India Service leh Mizoram sorkarah mi pawimawh ni pha, mi thiam chhuak thar kan nei ngai ta lo chu an inenfiah a ngai tih a sawi a. Central Service lam an cho pha lo a nih pawhin state service-ah tal lut tura an tan thar zel a tul thu a sawi.
Inrinni vek khan Dr R Lalthangliana hian S.Vanlaiphai PHC tlawh bawkin, thawktute’n mamawh hrang hrang an thlente chu a tul ang zela hmalaksak an nih tur thu a hrilh a. Hospital-a damlote kan nan tangka fai a hlan bawk.
He mi hnu hian Dr R Lalthangliana’n Hnahthiala ‘Capt.Lalhleia Memorial Inter-Village & District Open Badminton Tournament, 2023’ chu khuallian niin a kharna hun a hmanpui bawk.