Prime Minister Narendra Modi chuan duh lohna leh boycott-na karah India-a parliament building thar chu a hawng ta.
Eptu party tam tak chuan hawngtu atan hian Modi-a ni lovin, president an duh zawk avangin hawnna inkhawmah hian an tel dawn lo tih an sawi lawk.
Inkhawm chhung hian India- wrestler langsar tak takte chuan parliament building thar thleng kawng zawh an tum avangin man an ni bawk.
Building thar hian British hun laia sak parliament chu a thlak dawn a ni.
Hawnna inkhawm hi Pathianni zing dar 7:00 atanga tan a ni a. Modi-a’n ram kuta building hlanna plaque a hawng a, dan siamtu kal khawmte hmaah thu a sawi.
“Hei hi building a ni ringawt lo va. Indian tluklehdingawn 1.4 zette neih châk leh suangtuahna lang chhuak a ni a. Kan mipui rorelna temple tur a ni a, India-in khawvelah tumruhna a lantir a ni,” a ti.
Eptu party lian ber, Congress hruaitu, Rahul Gandhi chuan Modi-a chuan parliament hawn chu lalte lallukhum ang maiah a ngai tih Twitter-ah a tar lang.
Kar hmasa khan Congress pawh telin, party 19 chuan ‘a huhova thutlukna siamin’ hawnna inkhawm an boycott tur thu hi an puang.
Sorkar chuan ram hotu ber, President Droupadi Murmu-i chu building thar hawngtu atan an ti tur a nih thu an sawi a. Hindu nationalist ideologue VD Savarkar-a pianchama hawn chu an duh lo bawk tih an sawi.
Eptute hian Savarkar-a hi mi thinlung thentu anga an sawi laiin rorel lai, BJP chuan ‘hero’ niin an ngai ve thung.
BJP hian eptuten an boycott hi ‘mipui rorelna zah lohna’ an tihsak bawk.
Hawnna inkhawm a kal mek lai hian wrestler langsar tak takte chuan building thar kawt thleng kawng zawh an tum avangin police-in an man.
Wrestler zingah hian Olympic medallist-te pawh an tel a, a hma atang tawhin Delhi-ah an pawl (federation) president, Brij Bhushan Singh-a bân leh man phutna an lo tilang tawh a ni.
Singh-a hi MP hriat hlawh leh BJP mi a ni a, hmeichhe wrestler-te mipat hmeichhiatna rawngkaia tibuai leh thil danga chhaih thinah an puh a, ani hian a pha thung.
Modi-a hian sorkarin gold sceptre pawimawh tak nia a sawi, sengol an tih chu parliament building tharah hian a dah bawk.
Building thara ‘sengol thianghlim’ a awm hian dan siamtute rilru pawh a tiphur dawn niin a sawi.
Sorkar hian gold sceptre hi India prime minister hmasa ber, Jawaharlal Nehru-a hnenah Hindu pawl (sect)-a puithiamten an hlan a. Sengol hi ‘August 14, 1947-a British-ten India kuta thuneihna an hlan entirna’ niin an sawi bawk.
Eptu party-te erawh chuan sorkarin sceptre pawimawhna a sawi dan hi ‘a nihna bak’ niin an sawi ve thung.